ब्लकबस्टर निर्देशक दीपकप्रसाद आचार्य ‘काकु’को निर्देशनमा बनेको चलचित्र माघ १ गतेदेखि प्रदर्शनमा आउनेछ । जिग्री इन्टरटेनमेन्ट र प्रिमियर प्रोडक्सनको प्रस्तुतिमा निर्माण भइरहेको चलचित्र अहिले पोस्ट प्रोडक्सनमा छ ।

गत वर्ष आचार्यकै निर्देशनमा बनेको चलचित्र ‘परान’ वर्षकै सर्वाधिक ग्रस कलेक्सन गर्ने नेपाली चलचित्र बनेको थियो । उनको निर्देशनमा बन्न लागेको दोस्रो चलचित्र भएकाले पनि ‘चिरञ्जीवी भवः’लाई दर्शकले प्रतीक्षाका साथ हेरिरहेका छन् ।

चलचित्रमा कुमार कट्टेल ‘जिग्री ब्रो’ पनि दीपकप्रसाद आचार्यसँगै जोडिएका छन् । कुमारको कथामा दीपकले चलचित्र निर्माण गरेका हुन् । कथाको लेखनमा सविन अधिकारी र वसन्त न्यौपानेले सहकार्य गरेका छन् ।

सोसल ड्रामा जनरामा निर्माण भएको चलचित्रले दुई पुस्ताबीचको वैचारिक भिन्नता र उनीहरूबीचको सम्बन्धको कथालाई मुख्य विषयवस्तु बनाएको छ ।

उमेशकुमार बराल र चिरन केसी निर्माता रहेको चलचित्रमा गजित विष्ट र शैलेश खत्री कार्यकारी निर्माता छन् ।

चलचित्रका गीतमा निर्देशक दीपक आचार्य स्वयंको शब्द रहेको छ भने हर्क साउदको पनि सहकार्य छ । रञ्जित गजमेरको संगीतसमेत चलचित्रमा समावेश छ । बाबु गिरी, सुशान्त गौतम, निरञ्जन थापा र समीर खरेलले पनि संगीत दिएका छन् ।

चलचित्रमा शिवराम श्रेष्ठको छायांकन र मित्र डी. गुरुङको सम्पादन रहेको छ । गम्भीर विष्ट र किरण थापाले नृत्य निर्देशन गरेका छन् । रामबाबु खड्का प्रमुख सहायक निर्देशक छन् भने सागर बोहोरा, नेत्रबहादुर राउत र लक्ष्मी पौडेल सहायक निर्देशकका रूपमा रहेका छन् ।

सुवास राज काफ्ले प्रोजेक्ट म्यानेजर र विशाल न्यौपाने प्रोडक्सन डिजाइनर छन् । मेकअपमा विक्रम गौतम, स्टिल तथा बीटीएसमा सन्तोष क्षेत्री, प्रोडक्सनमा विष्णुप्रसाद मैनाली र अनिश लामिछाने तथा पब्लिसिटी डिजाइनमा टाउवा स्टुडियो (विजय बस्याल) रहेका छन् ।

चलचित्र माघ १ गते (१५ जनवरी) देखि देशभरका हलमा प्रदर्शन हुनेछ । रोहित कट्टेल र रत्न श्रेष्ठको आरआर फिल्म्सले चलचित्रको देशव्यापी वितरण गर्नेछ भने डिजिटल पार्टनर ओएसआर डिजिटल रहेको छ।