भरतपुर विमानस्थल विस्तार गर्न सेनाको घोडा प्रजनन केन्द्र सार्ने निर्णय

नमस्ते चितवन

शुक्रबार, माघ १९, २०८० मा प्रकाशित

सरकारले चितवनको भरतपुर विमानस्थल विस्तारका लागि नेपाली सेनाको घोडा प्रजनन् केन्द्र सार्ने निर्णय गरेको छ । बिहीबार बसेको मन्त्रिपरिषद् बैठकले सेनाको घोडा प्रजनन् केन्द्रलाई शक्तिखोरमा सार्न सैद्धान्तिक सहमति दिने निर्णय गरेको हो ।

भरतपुर महानगरपालिका प्रमुख रेनु दाहालले विमानस्थलको रनवे विस्तार गर्न घोडा प्रजनन् केन्द्र सार्ने निर्णय हुनु गौरवको विषय भएको बताउनुभएको छ । २०७४ सालमा मेयर निर्वाचित भएदेखि आफू विमानस्थल विस्तारमा लागेको बताउँदै उहाँले यो कार्य चितवन र आसपासका जिल्लावासीका लागि ऐतिहासिक र गौरवको क्षण भएको बताउनु भयो ।

अहिले भरतपुर विमानस्थलको रनवे सानो भएका कारणले ठूला जहाजहरु अवतरण हुन सक्दैन । भरतपुरमा सेनाको ७० विगाहा ८ कट्ठा ४ धुर जग्गा छ । सेनाको घोडा प्रजनन् केन्द्रले १९ विगाहा चर्चिएको छ । अब त्यसलाई शक्तिखोरमा सार्न आवश्यक संरचना तथा पूर्वाधार निर्माणका लागि आवश्यक पर्ने बजेट सरकारले उपलब्ध गराउनेछ ।

भरतपुरमा अहिले १२०० मिटर लामो र ३० मिटर चौडा रनवे छ । विस्तारपछि १५०० मिटर लामो रनवे बन्ने छ । विमानस्थलको पूर्वतर्फ निजी जमिन भएकाले विस्तार गर्न सक्ने अवस्था छैन । त्यहाँ नयाँ भवन निर्माण तथा र तला थप गर्न भने रोक लागएको छ ।