नेपाली कांग्रेसबाट भरतपुर महानगरपालिकाको उपमेयरमा चित्रसेन अधिकारी

नमस्ते चितवन

शनिबार, बैशाख १०, २०७९ मा प्रकाशित

वैशाख १० ,काठमाडौँ – नेपाली कांग्रेसले भरतपुर महानगरपालिकाको उपमेयरमा चित्रसेन अधिकारीलाई उम्मेदवार बनाउने भएको छ । महानगरका उम्मेदवार छान्न सभापति एवम् प्रधानमन्त्री शेरबहादुर देउवाले शीर्ष नेताहरूसँग छलफल गरिरहेका छन् । महानगरपालिकामध्ये कांग्रेसले केन्द्रबाट काठमाडौं, ललितपुर र विराटनगरमा मेयर र भरतपुर, वीरगञ्ज र पोखरामा उपमेयर पदका उम्मेदवारको छान्नुपर्नेछ ।

त्यसमध्ये भरतपुर महानगरपालिकाको उपमेयरमा कांग्रेसका तर्फबाट चित्रसेन अधिकारीलाई उम्मेदवार बनाउने सहमति भएको एक नेताले बताए । अधिकारी महानगर कार्यसमितिका सभापति समेत हुन् । उनले मेयरमा आकांक्षा देखाएका थिए ।भरतपुरमा मेयरका लागि २५ जना र उपमेयरका लागि २४ जना आकांक्षी थिए । सभापति देउवाले यसअघि सत्ता गठबन्धनमा सिट भागबण्डा हुने क्रममै भरतपुरमा कांग्रेसले उपमेयर लिने निधो भइसकेको भनेका थिए । शुक्रबार बसेको शीर्ष नेताहरूको बैठकमा सभापति देउवाले त्यही प्रस्ताव गरेका थिए ।

‘भरतपुरमा कांग्रेसले प्रमुख नपाएपछि उपप्रमुखमा धेरैको दाबी छ । सभापतिज्यूले नै महानगर कार्यसमितिको सभापति चित्रसेन अधिकारीलाई पहिल्यै वचन दिइसक्नुभएकोले त्यहाँको विषयमा धेरै विवाद रहेन,’ ती नेताले भने ।भरतपुरमा मेयर पदमा भने नेकपा माओवादी केन्द्रले रेनु दाहाललाई उम्मेदवार बनाउने निर्णय गरिसकेको छ । दाहालले मेयर उठ्नका लागि शुक्रबारै मेयर पदबाट राजीनामा दिइसकेकी छिन् ।