बाघको सङ्ख्या निश्चित सीमामा कायम गर्नुपर्छ : प्रधानमन्त्री ओली

नमस्ते चितवन

सोमबार, साउन १४, २०८१ मा प्रकाशित

ललितपुर ,साउन १४ । प्रधानमन्त्री केपी शर्मा ओलीले सङ्ख्या वृद्धि गर्ने क्रममा सधैँ दोब्बर बनाउने नभई सीमिततामा आधारित रहेर देशको क्षमताअनुसार बाघको सङ्ख्या वृद्धि गर्नुपर्ने बताउनुभएको छ ।

विश्व बाघ दिवस २०२४ का अवसरमा राष्ट्रिय निकुञ्ज तथा वन्यजन्तु संरक्षण विभागले आज ललितपुरमा आयोजना गरेको कार्यक्रममा बालबालिकासँग बाघ संवाद गर्दै प्रधानमन्त्री ओलीले वन्यजन्तुको सिकार र चोरी पैठारी रोकेर देशको क्षमताअनुसार बाघको संरक्षण गर्ने नीति रहेको बताउनुभयो।

‘देशको क्षमताभन्दा बढी बाघको सङ्ख्या वृद्धि गर्न सकिँदैन, हाम्रो क्षमतालाई नहेरी बाघको संख्यामात्रै वृद्धि गर्दा मानवीय विनाश निम्त्याउन सक्छ। यस्तो अवस्था आउन दिनु हुँदैन’ उहाँले भन्नुभयो, ‘प्रकृतिमा धेरै जीव तथा वन्यजन्तु रहेका छन्, उनीहरूका लागि सहज बासस्थान चाहिन्छ, उनीसँग द्वन्द्वको अवस्था आउन दिनुहुँदैन, मानिसले सचेत भएर जङ्गली जनावरसँगको द्वन्द्वको परिस्थिति आउन नदिन लाग्नुपर्छ, हामीले पहिलो सुरक्षा मानिसलाई दिनुपर्छ।’

कार्यक्रममा विभिन्न पाँच विद्यालयका बालबालिकाहरूले राखेको प्रश्नको जवाफ दिँदै उहाँले प्रकृति सबैको साझा भएको र मानव प्रकृतिको एउटा अंश मात्रै भएको बताउनुभयो । उहाँले बाघ र वन्यजन्तुको संरक्षणका लागि हालको सदर चिडियाखाना सानो भएको बताउँदै वैकल्पिक र उपयुक्त स्थानमा व्यवस्थापन गर्नुपर्ने आवश्यकता रहेको बताउनुभयो। उहाँले वन्यजन्तुको संरक्षणमा मानवलाई शिक्षा दिन पनि चिडियाखाना चाहिन्छ भन्ने धारणा राख्नुभयो ।

वि.सं. २०७३ सालमा आफै प्रधानमन्त्री हुँदा उद्घाटन गरिएको भक्तपुरको प्राणी उद्यानको निर्माण कार्य अगाडि बढाइने र ललितपुरको सदर चिडियाखाना सानो भएकाले अन्यत्र पनि चिडियाखाना स्थापना गरि वर्गीकरणका आधारमा वन्यजन्तुहरूलाई संरक्षण गर्न पहल गरिने जानकारी गराउनुभयो ।

तपाईँलाई प्रकृतिसँग प्रेम गर्न के कुराले प्रेरित गर्‍यो भन्ने विद्यार्थीको प्रश्नमा प्रधानमन्त्री ओलीको जवाफ थियो,’प्रकृति मन नपराउने मान्छे हुँदैन, म सानो हुँदा गोठालो लाग्ने गरेकाले गाईभैसी चराउन जङ्गलमा जाँदा प्रकृतिसँग रमाउन थालेँ, त्यसैवेला मैले बाघ पनि देखेँ, पछि बुझ्दै जाँदा जलवायु प्रणालीमा प्रकृति, खोला, नाला, जीवजन्तु, चराचुरुङ्गी सबैसँग प्रेम हुन थाल्यो।’