२४ अर्ब लागतमा दुई पाइपलाइन निर्माण गर्ने निगमको तयारी

नमस्ते चितवन

बुधबार, पुष २४, २०८१ मा प्रकाशित

नेपाल आयल निगमले पेट्रोल र मटितेल पनि पाइपलाइनबाट ल्याउने तयारी गरिरहेको छ । हाल डिजेल आयात भइरहेको मोतिहारी–अम्लेखगञ्ज पाइपलाइनबाट पेट्रोल र मटितेल पनि ल्याउनका लागि परीक्षण गरिरहेको निगमले जनाएको छ ।

प्रथम चरणको काम सम्पन्न भएर २०७६ भदौ २४ गते उक्त पाइपलाइनबाट डिजेल आयात गरिएको थियो । अहिले दोस्रो चरणको काम करिब सम्पन्न भइसकेको छ । निगमका प्रवक्ता मनोज ठाकुरले अब एक साताभित्र परीक्षण सकिने र तत्काल पेट्रोल र मटितेलतेल आयात गरिने जनाएको छ ।

‘दोस्रो चरणको काम लगभग सम्पन्न भइसकेको छ । अहिले परीक्षण गरिरहेका छौँ,’ प्रवक्ता ठाकुरले भने, ‘यस्तो परीक्षण अझै एक सातासम्म रहने छ । परीक्षण सकिनासाथ नियमित रुपमा डिजेल पेट्रोल, मटितेल आवश्यकताअनुसार आयात गर्ने तयारी गरेका छौँ ।’ ठाकुरका अनुसार दोस्रो चरणमा पेट्रोल ट्याङ्की, फायर सिस्टम, अन्य भौतिक पूर्वाधार निर्माणको काम सम्पन्न गरी परीक्षण भइसकेको छ । यस अवधिमा परीक्षणका लागि करिब ५५०० किलो लिटर पेट्रोल ल्याइएको र परीक्षण सफल भएको निगमले जनाएको छ । यसैगरी ११ सय किलोलिटर मटितेल पनि सोही पाइपलाइनबाट ल्याएर परीक्षण गरिसकेको छ ।

साढे २४ अर्ब लागतमा दुई पाइपलाइन
निगमका प्रवक्ता मनोज ठाकुरका अनुसार पेट्रोलियम पाइपलाइन योजना अन्तर्गत एक अन्तरदेशीय र एक आन्तरिक पाइपलाइन निर्माण अघि बढाइसकेको छ । निगमले साढे २४ अर्ब लागतमा दुई पाइपलाइनको निर्माण अघि बढाएको छ ।

नेपाल आयल निगम र इण्डियन आयल कर्पोरेशन (आईओसी) बिच बिजिनेस टु बिजिनेस (बीटुबी एग्रीमेन्ट) सम्झौता भएपछि थप एक अन्तरदेशीय र एक आन्तरिक पेट्रोलियम पाइपलाइन निर्माण कार्य अघि बढेको हो । बीटुबी सम्झौता २०८१ असोज १७ गते (२०२४ अक्टुबर ३) नयाँ दिल्लीमा भएको थियो ।