चलचित्र ‘छक्कापञ्जा ५’ले छ दिनमा कमायो १० करोड

नमस्ते चितवन

मङ्गलबार, असोज २९, २०८१ मा प्रकाशित

काठमाडौं ,असोज २९
इतिहासका विभिन्न कालखण्डमा भएका घटना तथा उपलब्धी हासिल भएको दिनलाई ऐतिहासिक दिनको रुपमा सम्झने गरिन्छ ।आज नेपाली चलचित्र क्षेत्रको लागि पनि ऐतिहासिक दिनको रुपमा रहने छ ।

दसैँको फूलपातीको अवसर पारेर बिहीबारबाट रिलिज भएको यस वर्षको बहुप्रतीक्षित चलचित्र ‘छक्कापञ्जा ५’ ले बक्स अफिसमा आक्रामक कलेक्सन गरेको छ। ‘छक्कापञ्जा ५’ले प्रदर्शनको छैटौं दिन मंगलबारसम्म देशब्यापी १० करोड बढीको ग्रस गर्ने देखिएको छ ।

चलचित्र ‘छक्कापञ्जा ५’ले प्रदर्शनमा आएको ५ दिनमा नै ९ करोड हाराहारीमा कलेक्सन गरेको चलचित्रका वितरकहरु मनोज राठी र बिक्रम पराजुलीले जानकारी दिए ।पाचौ दिन सम्म राजधानीमा ४ करोड ७० लाखको हाराहारी र राजधानी बाहिर ४ करोड ३० लाखको हाराहारी कलेक्सन गरेको वितरकले बताए। मंगलबार मात्रै फिल्मले डेढकरोड माथिको ग्रस कलेक्सन गर्ने देखिएको छ ।

मंगलबारसम्म चलचित्र ‘ ‘छक्का पञ्जा–५’को सम्पूर्ण सो हाउसफूल भएको हुदा चलचित्रले तिहारसम्म प्रदर्शनमा आउदा २० करोड माथिको व्यापार सजिलै गर्ने देखिन्छ । सामाजिक संजालमा चलचित्र हेर्ने दर्शकले यसअघिका चार वटै सिरिजको भन्दा उत्कृस्ट चलचित्र बनेको प्रतिक्रिया दिएका छन् ।

‘ ‘छक्का पञ्जा–५’मा हाँस्यव्यंग्यसँगै समाजका विभिन्न बेथितिमाथि प्रहार गरिएको छ । सरकारी सेवाभित्र भएको भ्रष्टाचार र अनियमितताको विषयलाई उठान गरिएको चलचित्रमा दीपकराज गिरी, केदार प्रसाद घिमिरे ‘माग्ने बुढा’, वर्षा सिवाकोटी, राजाराम पौडेल, रमेश वुढाथोकी, प्रकाश घिमिरे, नरेन्द्र थापा, उत्तम केसी, ब्रजेस खनाल, हिउँवाला गौतम, नविन श्रेष्ठ, दमन रुपाखेती, लोकेन्द्र लेखक र निर्मल शर्मा लगायतको अभिनय छ ।

चलचित्रलाई दीपाश्री निरौलाले निर्देशन गरेकी हुन् ।दीपकराज गिरीको कथा र पटकथा रहेको फिल्ममा दीपकराज गिरी, केदार प्रसाद घिमिरे र दिलिप तामाङको संवाद छ । आमा सरस्वती मुभिज र आएमईको प्रस्तुतीमा निर्माण भएको चलचित्रमा केदार प्रसाद घिमिरे र निर्मल शर्मा कार्यकारी निर्माता रहेको फिल्ममा केशव न्यौपाने र दीपेन्द्र खनियाँ निर्माताको रुपमा छन् ।