कडरियाले ‘महाभोज’लाई सामाजिक आन्दोलनको रूपमा प्रचार गर्न चाहँदैनन् । तर उनी चाहन्छन्, यो फिल्मले मानिसहरूलाई सोच्न, प्रश्न गर्न, मौनतालाई तोड्न प्रेरणा देओस् । “यदि त्यो सोच चेतनामा रूपान्तरण भयो भने, त्यो नै आन्दोलनको सुरुवात हो,” उनी भन्छन् ।

संवेदनशील विषय उठाउँदा केही सावधानी अपनाउनुपरेको अनुभव पनि उनी बाँड्छन् । “कुनै प्रत्यक्ष सरकारी दबाब त आएन, तर विषयवस्तु नै यस्तो थियो कि आत्मसंयम अत्यावश्यक भयो,” कडरियाको भनाइ छ ।

पात्र र प्रस्तुतिमा यथार्थको गहिराइ

फिल्मको अर्को बलियो पक्ष यसको कलाकार चयन हो । दयाहाङ राई, आर्यन सिग्देल, खगेन्द्र लामिछाने, गौमाया गुरुङ, मलिका महतजस्ता कलाकारहरूले भूमिकालाई जीवन्त बनाएका छन् । “उनीहरूले पात्रलाई आत्मसात् गरे, त्यसैले यथार्थ महसुस हुन्छ,” निर्माता बताउँछन् ।

यथार्थ र कथाको सन्तुलन मिलाउनु भनेको निर्माण पक्षका लागि सबैभन्दा चुनौतीपूर्ण काम थियो । भावनात्मक विषयलाई शोषण नगरी, सम्मानका साथ प्रस्तुत गर्नुपर्ने दायित्व निर्देशक दिनेश राउतले कुशलतापूर्वक निर्वाह गरेको उनी विश्वास दिलाउँछन् ।

दर्शकका लागि एक ‘अनुभव’

फिल्मको ट्रेलरले उत्साहजनक प्रतिक्रिया पाएको छ । त्यसले निर्माण टिममा आशावाद थपेको छ । कडरिया भन्छन्, “हामी चाहन्छौँ, दर्शकले फिल्मलाई कथा मात्र होइन, अनुभवको रूपमा महसुस गरून् ।”

मौनतामाथि प्रश्न

‘महाभोज’ एक प्रयास हो – मौनतालाई चुनौती दिने । सत्यलाई मुखर बनाउने । “अब पनि चुप लाग्ने? कि बोल्ने?” – यही प्रश्न फिल्मले सबैलाई सोधेको छ । यो प्रश्न यति प्रासङ्गिक छ कि यसले केवल सिनेमा हलसम्म सीमित नबसी, समाजभित्र गुञ्जन सक्छ ।

‘महाभोज’ एउटा यस्तो सिनेमा हो जसले दर्शकलाई केवल केही समयको मनोरञ्जन होइन, गहिरो आत्म समीक्षा र समाजप्रति उत्तरदायित्व बोध गराउने प्रयास गर्छ । हिमाल कडरियाको शब्दमा – “यो संयोग हो, तर अर्थपूर्ण संयोग हो ।”