लमजुङका चार मतदानस्थलमा पुग्दैन यातायात

नमस्ते चितवन

मङ्गलबार, पुष ०१, २०८२ मा प्रकाशित

फागुन २१ गते तोकिएको प्रतिनिधिसभा निर्वाचनका लागि छनोट भएका लमजुङका चार वटा मतदानस्थल सवारी साधनको पहुँच बाहिर छन् । भौगोलिक कठिनाइ, कच्ची बाटो तथा अपर्याप्त पूर्वाधारका कारण ती स्थानसम्म गाडी पुग्न नसक्ने अवस्था रहेको हो ।

लमजुङको दुधपोखरी गाउँपालिका–१ ठुलीबारी सामुदायिक भवन, मध्यनेपाल नगरपालिका–८ स्थित विश्वज्योति आधारभूत विद्यालय मजुवाबेंसी, मर्स्याङ्दी गाउँपालिका–५ स्थित रत्न विद्यामन्दिर उपल्लो चिप्ला र सोही वडाको गङ्गामिलन मावि घेर्मु फाँटमा रहेका मतदानस्थल सवारी साधनको पहुँच बाहिर छन् ।

सवारी साधनको पहुँच नभएका यी चारवटासहित ३० वटा मतदानस्थललाई जिल्ला सुरक्षा समितिकाले अति संवेदनशील मतदानस्थलमा राखेको छ । आगामी फागुन २१ गते हुने प्रतिनिधिसभा निर्वाचनका लागि सुरक्षा चुनौतीको आधारमा वर्गीकरण गरिएकोमा लमजुङमा ३० मतदानस्थल अति संवेनशील हुन् ।

लमजुङमा १३० मतदानस्थलमा १८६ मतदान केन्द्र छन् । निर्वाचनलाई लक्षित गरेर एकीकृत सुरक्षा योजना बनाएर गृह मन्त्रालयमा पठाएको जिल्ला प्रशासन कार्यालयले जनाएको छ । अति संवेदनशील मतदानस्थलमा सोही अनुसार सुरक्षाकर्मी थप परिचालन हुने प्रमुख जिल्ला अधिकारी डा. टोकराज पाण्डेले बताउनुभयो । यसरी वर्गीकरण गरिएका मतदानस्थलहरूमा सुरक्षाकर्मीको सङ्ख्या कति र कसरी परिचालन गर्ने भन्नेबारे एकीकृत सुरक्षा योजना बनाइएको प्रजिअ पाण्डेले बताउनुभयो ।

गत निर्वाचनमा लमजुङमा १२८ मतदान स्थल थिए । यसपटक २ वटा मतदान स्थल थप भएको जिल्ला निर्वाचन अधिकारी यादवराज आचार्यले जानकारी दिनुभयो । थपिएका मतदानस्थलमा दोर्दी गाउँपालिका–२ अर्चलबोटको अलैंचे केदार आधारभूत विद्यालय र बेंसीशहर नगरपालिका–१० पासाचौरको कालिका आधारभूत विद्यालय मतदान स्थल छन् ।

मतदान स्थल सिफारिस समितिले मर्स्याङ्दी गाउँपालिका–३ थाकनकोे विनायक आधारभूत विद्यालयमा मतदान स्थल पनि थप्न सिफारिस गरेको थियो, तर स्वीकृत भएन ।