त्यस्तै, कला, साहित्य, पत्रकारिता तथा सामाजिक सेवामा योगदान पुर्‍याउने डा. मोहनलाल घिसिङ, सीतारम पोखरेल, आरपी पन्त, गोपालकाजी कायस्थ, विजयरत्न तुलाधर, विनोद देवकोटा, सरोज बास्तोला, मञ्जु लावती, शशी लुमुम्बू, राधाकुमारी दाहाल, योगराज पाण्डे ‘रञ्जन’, अशोक बराल, शान्ति गुरुङ, वसन्ती सदा शंकर, विन्दिरा श्रेष्ठ, स्वस्तिका पन्थी र सुमन सापकोटालगायतलाई ‘मिलाप सम्मान’ प्रदान गरिएको थियो ।

कार्यक्रममा वक्ताहरूले नेपाली कला, साहित्य र संगीत राष्ट्रिय पहिचान, भाषा, संस्कृति तथा सामाजिक चेतनाका महत्त्वपूर्ण संवाहक भएको उल्लेख गर्दै स्रष्टाहरूको योगदानको उचित कदर हुनुपर्नेमा जोड दिएका थिए ।

प्रमुख अतिथि वसुन्धरा भुसालले नेपाली कला क्षेत्रको विकास र संरक्षणमा स्रष्टाहरूको महत्त्वपूर्ण भूमिका रहेको बताउँदै उनीहरूको योगदानको सम्मान गर्ने कार्य प्रशंसनीय भएको धारणा राखिन् । यस्ता कार्यक्रमले विभिन्न विधामा सक्रिय प्रतिभालाई एकै ठाउँमा जोड्नुका साथै आपसी सद्भाव र सहकार्यलाई प्रोत्साहन गर्ने उनको भनाइ थियो ।

पुरस्कृत व्यक्तित्व दाहालले आफूलाई पुरस्कार प्रदान गरेकोमा आयोजकप्रति आभार व्यक्त गरे । साहित्य सिर्जनामा निरन्तर लागिरहने क्रममा विभिन्न पुरस्कार तथा सम्मान प्राप्त भएको उल्लेख गर्दै उनले सिर्जनात्मक यात्रालाई निरन्तरता दिने बताए ।

त्यस्तै, अन्तर्राष्ट्रिय नेपाली साहित्य समाजका पूर्वअध्यक्ष एवं साहित्यिक पत्रकार संघका अध्यक्ष राधेश्याम लेकाली, चलचित्र विकास बोर्डका सदस्य गणेश सुवेदी तथा ‘टीका–गोपाल राष्ट्रिय गीतसंगीत पुरस्कार’का सल्लाहकार एवं संगीतकार सन्तोष श्रेष्ठले शुभकामना मन्तव्य व्यक्त गरेका थिए । उनीहरूले मिलाप मासिकले नेपाली कला, साहित्य र संगीत क्षेत्रको प्रवर्द्धन तथा स्रष्टाहरूको सम्मानका लागि गर्दै आएको कार्यको प्रशंसा गरेका थिए ।

कार्यक्रममा मिलाप मासिककी कार्यकारी सम्पादक गीता अधिकारीले स्वागत मन्तव्य राखेकी थिइन् भने निर्देशक माधवराज खरेलले कार्यक्रम सञ्चालन गरेका थिए । बालकलाकार काब्य अधिकारीले स्वागत नृत्य प्रस्तुत गरेकी थिइन् । सो अवसरमा प्रमुख अतिथिलगायत विशिष्ट व्यक्तित्वलाई मायाको चिनोसमेत प्रदान गरिएको थियो ।

समारोहमा वरिष्ठ साहित्यकार लेखनाथ पोखरेल, अन्तर्राष्ट्रिय नेपाली साहित्य समाज नेपाल च्याप्टरका महासचिव रमेश दाहाल, वरिष्ठ पत्रकार सानुकाजी श्रेष्ठ, तुलसी गिरी ‘भावुक’, डब्बु क्षेत्री, निमेश गौतम, साहित्यकार शैलेन्द्र चापागाईं, सविता बेहोसी, वरिष्ठ पत्रकार तथा गीतकार शान्तिप्रिय, वरिष्ठ कलाकार लय संग्रौला, नायिका तथा गायिका सारिका घिमिरे, निर्देशक रामशरण कोइराला र नायक श्रीदेव भट्टराईलगायत कला, साहित्य, पत्रकारिता तथा मनोरञ्जन क्षेत्रका व्यक्तित्वहरूको उपस्थिति थियो ।

कार्यक्रमको समापन गर्दै सभापति एवं मिलाप मासिकका सम्पादक कृष्ण भुसालले स्रष्टा तथा साधकहरूको योगदानको सम्मान गर्नु नेपाली कला, साहित्य र संस्कृतिको संरक्षण तथा प्रवर्द्धनको महत्त्वपूर्ण आधार भएको बताए । १७ वर्षदेखि निरन्तर प्रकाशन हुँदै आएको मिलापले विभिन्न क्षेत्रका प्रतिभालाई प्रोत्साहन गर्दै एउटै मञ्चमा जोड्ने अभियानलाई आगामी दिनमा पनि निरन्तरता दिने प्रतिबद्धता उनले व्यक्त गरे ।