सरकारद्वारा रवि लामिछानेविरुद्धका संगठित अपराध र सम्पत्ति शुद्धीकरण अभियोग फिर्ता

नमस्ते चितवन

बुधबार, पुष ३०, २०८२ मा प्रकाशित

काठमाडौं । सरकारले महान्यायाधिवक्ता कार्यालयमार्फत राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध विभिन्न जिल्ला अदालतमा दायर गरिएको संगठित अपराध तथा सम्पत्ति शुद्धीकरणसम्बन्धी अभियोग फिर्ता लिएको छ ।

महान्यायाधिवक्ता कार्यालयको निर्देशनअनुसार सम्बन्धित सरकारी वकिलमार्फत मुद्दा फिर्ता लिने प्रक्रिया अघि बढाइएको हो । यद्यपि, लामिछानेविरुद्ध दायर सहकारी ठगीसम्बन्धी मुद्दा भने यथावत् रहने जनाइएको छ ।

सहकारी ठगी प्रकरणसँगै जोडेर लगाइएका संगठित अपराध र सम्पत्ति शुद्धीकरणका अभियोग राजनीतिक पूर्वाग्रहका आधारमा लगाइएको दाबी गर्दै लामिछानेको पक्षबाट यसअघि नै मुद्दा फिर्ताका लागि निवेदन दर्ता गरिएको थियो ।

महान्यायाधिवक्ताको निर्णयपछि जिल्ला अदालत कास्कीमा चलिरहेको संगठित अपराध र सम्पत्ति शुद्धीकरणसम्बन्धी मुद्दा फिर्ता हुने भएको छ । त्यस्तै, रुपन्देही, काठमाडौं र पर्सा जिल्ला अदालतमा दायर संगठित अपराधसम्बन्धी मुद्दा पनि फिर्ता गरिने जनाइएको छ ।