त्यसकारण आफुले गोरखाको विकासका लागि ‘हरित विकास’ को अवधारणा अघि सारिएको उनले स्पष्ट पारे । ‘गोरखाको भौगोलिक संवेदनशीलता र पर्यावरणको संरक्षण मेरो प्रमुख एजेन्डा हो’ उनले भने, ‘वातावरण र विकासबीच सन्तुलन मिलाउने हरित विकासको स्पष्ट खाकासहित अन्धाधुन्ध डोजरे विकासको विकल्पमा वैज्ञानिक भौतिक पूर्वाधार निर्माणको पहल गर्छु ।’

शिक्षा, स्वास्थ्य र युवा स्वरोजगारमा जोड

न्यौपानेले सामुदायिक विद्यालयको गुणस्तर सुधारका लागि अधिकतम प्रयत्न गर्दै सर्वसुलभ स्वास्थ्य सेवाको सुनिश्चितताका लागि पहल गर्ने प्रतिबद्धता गरेका छन् । उनले स्वरोजगार र उद्यमशीलता प्रवद्र्धन गर्न, स्थानीय स्रोत र सीपको उपयोग बढाउन, वैदेशिक निर्भरता घटाउँदै आन्तरिक अर्थतन्त्र सुदृढ गर्न मद्दत गर्ने भएकाले प्राविधिक र सीपमूलक शिक्षामा जोड दिइने उल्लेख गरेका छन् । यस्तो गर्दा शैक्षिक सुधार मात्रै नभई समग्र गोरखाको सामाजिक–आर्थिक रूपान्तरणको आधार पनि हुने भएकाले यसमा जोड दिइने बताइएको छ ।

युवाहरूलाई देशभित्रै रोजगारी सिर्जना गर्ने र आत्मनिर्भर अर्थतन्त्र निर्माण गर्न स्थानीय सम्भावनाको विस्तृत अध्ययन गर्ने पनि प्रतिबद्धता गरिएको छ । त्यसैरी गोरखा क्षेत्र नं. २ को उत्तरी भेगमा पर्यटन, मध्य भेगमा फलफूल तथा नगदे बाली र दक्षिणी भेगमा शैक्षिक केन्द्र बन्न सक्ने प्रचुर सम्भावनालाई नीतिगत र कार्यक्रमको रूपमा अगाडि बढाउने बताइएको छ ।

न्यौपानेले राजनीतिलाई व्यापार नभई विशुद्ध समाजसेवा बनाउने सङ्कल्प गरेका छन् । भ्रष्टाचारविरुद्ध शून्य सहनशीलता अपनाउने, बोली र व्यवहारमा एकरूपता हुने राजनीतिक संस्कृति निर्माणको अभियान सञ्चालन गर्ने, सार्वजनिक सेवा प्रवाहलाई पारदर्शी र जनमुखी बनाउन डिजिटाइजेसन आधारभूत सर्त भएकाले त्यसअनुरूपको नीति कार्यक्रम निर्माणका लागि पहल गर्ने पनि बताइएको छ ।

उनले दलित, महिला, जनजाति, मुस्लिम एवम् पछाडि पारिएका वर्गको अधिकारका लागि लड्ने आधारभूत वर्गको साथीको रूपमा आफु रहेको भन्दै सबै प्रकारका शोषण, उत्पीडन र विभेदविरुद्ध उपलब्ध सबै मञ्चमा निरन्तर आवाज उठाउने पनि प्रतिबद्धता गरेका छन् । सीमान्तीकृत तथा अल्पसङ्ख्यक समुदायको सशक्तीकरणका लागि भुइँ तहदेखि नै कार्यक्रमहरू तर्जुमा गर्ने उनको अठोट छ ।