नीताको डेब्यु निर्देशन ‘पार्वती’मा अशोक दर्जीसँग विशेष सम्बन्ध

काठमाडौं । अभिनेत्री नीता ढुंगानाले आफ्नो डेब्यु निर्देशकीय चलचित्र ‘पार्वती’को पहिलो झलक सार्वजनिक गरिएको छ ।निर्माण पक्षले शुक्रबार एक कार्यक्रमको आयोजना गर्दै दुईवटा पोस्टर सार्वजनिक गरेको हो । सार्वजनिक भएका यस चलचित्रका दुईवटा पोस्टरले दर्शकमाझ ठूलो कौतुहलता पैदा गरेको छ ।

यी पोस्टरहरूले नीतालाई एउटा भिन्न र चुनौतीपूर्ण चरित्रमा उभ्याएको छ । जसमध्य एक पोस्टरमा नीता ढुंगाना स्कुले छात्राको पोसाकमा देखिन्छिन् । जहाँ उनलाई छोटो कपाल घाँटीमा कालो धागो र नीलो फ्रक (पिनाफोर) मा उनी एक सामान्य विद्यार्थीभन्दा केही फरक देखिन्छिन् ।

सामान्यतया नेपाली चलचित्रका नायिकाहरू लामो कपाल र शृङ्गारमा देखिन्छन्, तर नीताले यहाँ ‘डी-ग्लाम’ लुक्स अपनाएकी छिन् । यसले उनको पात्र ‘पार्वती’ कुनै विशेष मानसिक वा सामाजिक अवस्थाबाट गुज्रिरहेको संकेत गर्छ । उनको हेराई र मुस्कानमा एउटा अलग्गै खालको इन्नोसेन्स (निर्दोषता) देखिन्छ । यसले पार्वती समाजले सोचेजस्तो ‘सामान्य’ पात्र नभएर आफ्नै संसारमा रमाउने पात्र भएको दर्शाउँछ ।

यस्तै अर्को पोस्टरमा बालगायक तथा कलाकार अशोक दर्जीले नीतालाई पिठ्युँमा बोकेका छन् । यो तस्बिर आफैँमा एउटा बलियो विम्ब हो ।

उमेरले सानो भए पनि अशोकको पात्रले नीताको पात्रलाई बोक्नुले चलचित्रमा अशोकको भूमिका एक संरक्षक वा अटुट सहाराको रूपमा रहेको बुझिन्छ । दुवैको अनुहारमा झल्किने उन्मुक्त हाँसोले उनीहरूबीचको सम्बन्धमा कुनै स्वार्थ नभएको र यो एक शुद्ध भावनात्मक कथा भएको पुष्टि गर्छ । नीताले आकाशतर्फ देखाएको औँलाले पात्रका ठूला सपना वा कल्पनाशीलताको प्रतिनिधित्व गर्छ ।

चलचित्रको शीर्षक ‘पार्वती’ लेखिएको शैलीले पार्वतीको जीवनमा आइपर्ने बाधा, विद्रोह वा समाजले उनीमाथि लगाएको कुनै ‘ट्याग’लाई काट्न खोजेको संकेत गर्छ ।

दोस्रो पोस्टरको पृष्ठभूमिमा भित्ताभरि चकले ‘माया’, ‘परिवार’, ‘स्नेह’, ‘किरण’ जस्ता शब्दहरू लेखिएका छन् । यसले चलचित्रको मूल भाव र यो स्कुल वा शिक्षाको परिवेशमा बुनिएको कथा हो भन्ने स्पष्ट पार्छ ।

चलचित्र २०८३ सालको रक्षाबन्धन भदौ १२ मा प्रदर्शन हुने छ । पोस्टरमा दिदी-भाइ जस्तो देखिने सम्बन्धलाई चित्रण गरिनु र रिलिजका लागि रक्षाबन्धन रोजिनुले यो चलचित्र दिदी-भाइको भावनात्मक सम्बन्ध र सामाजिक दायित्वमा केन्द्रित हुने देखिन्छ ।

यो चलचित्र नीताका लागि एउटा ठूलो जोखिम र अवसर दुवै हो । कथा, पटकथा, निर्देशन र मुख्य भूमिका आफैँले सम्हाल्नुले उनले यो चलचित्रलाई एउटा ‘ड्रिम प्रोजेक्ट’ को रूपमा लिएको बुझिन्छ ।

ट्राइडेन्ट कन्सेप्टले तयार पारेको ‘पार्वती’ का यी दुई पोस्टरले एउटा कुरा प्रस्ट छ । योे चलचित्र नियमित फर्मुला फिल्मभन्दा फरक हुनेछ । अशोक दर्जीको सरलता र नीताको नयाँ अवतारले दर्शकमा ठूलो कौतुहलता जगाएको छ । यदि पोस्टरले दिएको यो गम्भीर र भावनात्मक संकेतलाई चलचित्रले पर्दामा उतार्न सक्यो भने ‘पार्वती’ नीता ढुंगानाको करियरको कोशेढुङ्गा साबित हुन सक्ने अनुमान लगाउन सकिन्छ ।

यस चलचित्रमा नीता र अशोकसहित दीपाश्री निरौला, सिरु बिष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेल लगायतको अभिनय छ ।

नीता ढुंगाना फिल्म्सको प्रस्तुतिमा निर्माण भएको यो चलचित्रका निर्माता हरिहर अधिकारी हुन् । विभिन्न सफल चलचित्र खिचिसकेका छायांकार सुदिप बरालको डिओपी रहेको यस चलचित्रको संवाद शिवम् अधिकारीले तयार पारेका हुन् ।

यस चलचित्रमा सरोज अधिकारी क्रियटिभ निर्देशक रहेका छन् । सरोज कार्टुन क्रुका डान्सर तथा निर्देशक हुन् । उनी पहिलो पटक यस चलचित्रमा क्रियटिभ निर्देशकका रुपमा काम गर्न लागेका हुन् ।यस चलचित्रमा प्रोडक्सनको काम शंकर पाण्डेले हेर्दैछन् । चलचित्रमा उनी नै कार्यकारी निर्माता पनि छन् । चलचित्रमा साहिल खानको सम्पादन रहने छ ।

युवराज काफ्ले, हर्क साउद, बाबुल गिरी र सिद्धार्थ सरकार पौडेलको गीत रहने यो चलचित्रमा प्रशान्त सिवाकोटी, बाबुल गिरी, सिद्धार्थ सरकार पौडेल र दीपक शर्माको संगीत रहने छ ।

यस्तै, चलचित्रमा रामजी लामिछानेको नृत्य निर्देशन, नवराज शर्माको सहायक निर्देशन, अलिस कार्कीको पार्श्व संगीत छ ।यो चलचित्रलाई रिच इन्टरटेनमेन्ट, एप्पल इन्टरटेनमेन्ट, र एफ.डी. कम्पनीले वितरण गर्ने जिम्मा लिएका छन् । डिजिटल पार्टनर ‘ओएसआर डिजिटल’ रहेको छ ।