आर्सनलको ऐतिहासिक सफलता, २२ वर्षपछि प्रिमियर लिग उपाधि

नमस्ते चितवन

बुधबार, जेठ ०६, २०८३ मा प्रकाशित

काठमाडौं, जेठ ०६
आर्सनलले २२ वर्षपछि इंग्लिस प्रिमियर लिगको उपाधि जित्दै ऐतिहासिक सफलता हासिल गरेको छ । अन्तिम चरणसम्म निकै रोमाञ्चक बनेको उपाधि दौडमा म्यानचेस्टर सिटीले अंक गुमाएपछि आर्सनल च्याम्पियन बनेको हो ।

म्यानचेस्टर सिटीले बोर्नमाउथसँग १–१ गोलको बराबरी खेलेपछि उपाधि जित्ने सम्भावना समाप्त भयो । सिटीलाई उपाधि होड कायम राख्न जित अनिवार्य थियो । तर, बोर्नमाउथले उत्कृष्ट प्रदर्शन गर्दै सिटीलाई रोक्न सफल भयो ।

सिटी बराबरीमा रोकिएलगत्तै हजारौं आर्सनल समर्थकहरू लण्डनस्थित इमिरेट्स स्टेडियम पुगेका थिए । समर्थकहरूले क्लबको ऐतिहासिक सफलताको खुशीयालीमा भव्य उत्सव मनाएका थिए ।

मिकेल आर्टेटाको प्रशिक्षणमा रहेको आर्सनलले पछिल्ला केही वर्षदेखि लगातार राम्रो प्रदर्शन गरे पनि उपाधिबाट वञ्चित हुँदै आएको थियो । यसअघि लगातार तीन सिजन दोस्रो स्थानमै सीमित बनेको टोलीले यसपटक भने शानदार पुनरागमन गर्दै ट्रफी आफ्नो नाममा पार्न सफल भयो ।

आर्सनलले सोमबार रेलिगेसनमा परिसकेको बर्न्लीलाई १–० ले हराउँदै शीर्षस्थानमा पाँच अंकको अग्रता बनाएको थियो । त्यसपछि सिटीले अंक गुमाएसँगै आर्सनल औपचारिक रूपमा च्याम्पियन घोषित भयो ।

उपाधि दौड गुमाएपछि सिटीका प्रशिक्षक पेप ग्वार्डिओलाले आर्सनललाई बधाई दिएका छन् । उनले आर्सनल, प्रशिक्षक टोली, खेलाडी र समर्थक सबै उपाधिका योग्य रहेको बताएका छन् ।