रविसहितको मुद्दाबाट ‘संगठित अपराध’ र ‘सम्पत्ति शुद्धीकरण’ हटाइयो, सहकारी ठगी मुद्दा मात्र अघि बढ्ने

नमस्ते चितवन

शुक्रबार, जेठ ०८, २०८३ मा प्रकाशित

काठमाडौं । सूर्यदर्शन बचत तथा ऋण सहकारी संस्थाको रकम अपचलन प्रकरणमा कास्की जिल्ला अदालतले महत्वपूर्ण आदेश जारी गर्दै प्रतिवादीहरूविरुद्ध लगाइएका ‘संगठित अपराध’ र ‘सम्पत्ति शुद्धीकरण’ सम्बन्धी अभियोग हटाउन अनुमति दिएको छ। अब मुद्दा सहकारी ठगीको अभियोगमा मात्र केन्द्रित हुने भएको छ।

न्यायाधीश हिमलाल बेल्बासेको इजलासले जिल्ला सरकारी वकिल कार्यालय कास्कीले पेश गरेको अभियोगपत्र संशोधनको निवेदन स्वीकार गर्दै मुद्दाको दायरा सीमित गर्ने आदेश दिएको हो। यससँगै रवि लामिछाने, जीबी राई, छविलाल जोशीलगायत प्रतिवादीहरूविरुद्ध सहकारी ठगीसम्बन्धी कानुनी प्रक्रिया मात्र अगाडि बढ्नेछ।

अदालतले बचतकर्ताको रकम फिर्ता गराउनु नै मुद्दाको मुख्य उद्देश्य भएको उल्लेख गर्दै जटिल फौजदारी अभियोग कायम रहँदा रकम असुली र न्यायिक प्रक्रिया लम्बिन सक्ने निष्कर्ष निकालेको छ। आदेशमा पीडित बचतकर्ताको हितलाई केन्द्रमा राखेर छिटो न्याय र रकम फिर्ताको सम्भावनालाई प्राथमिकता दिइएको उल्लेख गरिएको छ।

यस निर्णयसँगै लामो समयदेखि चर्चामा रहेको सूर्यदर्शन सहकारी प्रकरणले नयाँ कानुनी मोड लिएको छ। अदालतको आदेशले अब मुद्दालाई सहकारी ठगीको मूल विषयमा केन्द्रित गर्दै सुनुवाइ प्रक्रिया अगाडि बढ्ने बाटो खुलेको छ।