काठमाडौं, जेठ १५ गते । १९औँ गणतन्त्र दिवसका अवसरमा रामचन्द्र पौडेल ले सभ्य, सुसंस्कृत तथा समुन्नत समाज निर्माणका लागि आ–आफ्नो क्षेत्रबाट योगदान पुर्याउन राजनीतिक दल, नागरिक समाज तथा सम्बद्ध सबै पक्षलाई आह्वान गर्नुभएको छ।
गणतन्त्र दिवसको शुभकामना सन्देश जारी गर्दै राष्ट्रपति पौडेलले मुलुकको स्वतन्त्रता, सार्वभौमिकता, भौगोलिक अखण्डता, राष्ट्रिय एकता, स्वाधीनता, राष्ट्रिय हित र स्वाभिमानलाई अक्षुण्ण राख्दै दिगो, फराकिलो र समन्यायिक आर्थिक वृद्धि हासिल होस् भन्ने कामना व्यक्त गर्नुभएको छ।
उहाँले स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, शान्ति र समृद्धिको शुभकामनासमेत व्यक्त गर्नुभएको छ।
सन्देशमा भनिएको छ, “सङ्घीय लोकतान्त्रिक गणतन्त्रात्मक शासन व्यवस्थामार्फत उत्तरदायी र जनमुखी सेवा प्रवाहलाई सुदृढ बनाउँदै सुशासन, विकास र समृद्धिको लक्ष्य प्राप्त गर्नु आजको राष्ट्रिय आवश्यकता हो।”
राष्ट्रपति पौडेलले संविधानले परिकल्पना गरेको सामाजिक न्याय, आर्थिक समृद्धि तथा समावेशी विकास हासिल गर्न सबै तहका सरकार, निजी क्षेत्र र नागरिक समाजबीच सहकार्य आवश्यक रहेको उल्लेख गर्नुभएको छ।
उहाँले लोकतान्त्रिक गणतन्त्र स्थापनाका लागि जीवन उत्सर्ग गर्ने सम्पूर्ण ज्ञात–अज्ञात सहिदप्रति श्रद्धाञ्जली अर्पण गर्दै आन्दोलनमा सहभागी राजनीतिक दलका नेता, कार्यकर्ता तथा आमनागरिकको योगदानको प्रशंसा गर्नुभएको छ।
यसैबीच, रामसहायप्रसाद यादव ले पनि गणतन्त्र दिवसका अवसरमा शुभकामना सन्देश जारी गर्दै लोकतन्त्र, सङ्घीयता, समावेशिता र संविधानका उपलब्धिको रक्षा गर्दै राष्ट्रिय एकता र अखण्डतालाई सबल बनाउन सबैलाई प्रेरणा मिलोस् भन्ने कामना गर्नुभएको छ।
उहाँले संविधानले दिएको अधिकार र कर्तव्यलाई समान रूपमा आत्मसात् गर्दै अघि बढ्न सके मात्रै सङ्घीय लोकतान्त्रिक गणतन्त्रात्मक व्यवस्था अझ सुदृढ र जीवन्त बन्ने उल्लेख गर्नुभएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.