चितवन, असार ६ गते । राष्ट्रिय स्वतन्त्र पार्टी (रास्वपा)का सभापति रवि लामिछानेले महाधिवेशन पार्टीलाई थप वैधानिक, संस्थागत र लोकतान्त्रिक ढङ्गले अगाडि बढाउने महत्त्वपूर्ण अवसर भएको बताउनुभएको छ ।
रास्वपाको प्रथम महाधिवेशनअघि भरतपुरमा आयोजित केन्द्रीय समितिको अन्तिम बैठकलाई सम्बोधन गर्दै सभापति लामिछानेले पार्टीलाई यहाँसम्म ल्याउन नेता–कार्यकर्ता, सदस्य तथा शुभेच्छुकको महत्त्वपूर्ण योगदान रहेको उल्लेख गर्दै यस्तो बताउनुभएको हो ।
उहाँले विगतमा धेरै सङ्घर्षका बिच पार्टीलाई स्थापित गर्न सफल भएको भन्दै अहिले केही अनुकूल परिस्थिति सिर्जना भएको बताउनुभयो । “देशप्रति माया र जिम्मेवारी बोक्ने सबैलाई म सम्मान गर्दछु,” उहाँले भन्नुभयो, “सभापतिको रूपमा काम गर्दा मैले कति न्याय दिन सकेँ भन्ने मूल्याङ्कन यहाँहरूले गर्नुभएको छ भन्ने विश्वास लिएको छु ।”
सभापति लामिछानेले मुलुकलाई वर्तमान अवस्थामा ल्याउन विभिन्न कालखण्डमा योगदान गर्ने सबैप्रति सम्मान व्यक्त गर्दै लोकतन्त्र र सङ्घीयताको मार्गबाट पार्टी विचलित नहुने स्पष्ट पार्नुभयो । उहाँले पार्टी जीवनमा आन्तरिक लोकतन्त्र अपरिहार्य रहेको उल्लेख गर्दै सदस्यबिच एकता, सहकार्य र आपसी सद्भाव कायम रहनुपर्नेमा जोड दिनुभयो ।
उहाँले पार्टीमा जुनसुकै जिम्मेवारीमा रहे पनि सबैले असल नागरिकको भूमिका निर्वाह गर्नुपर्ने बताउनुभयो । केन्द्रीय सदस्य, साधारण सदस्य वा अन्य कुनै भूमिकामा रहे पनि पार्टीको उद्देश्य र मूल्य मान्यतालाई आत्मसात् गर्दै अघि बढ्नुपर्ने उहाँको भनाइ थियो ।
सभापति लामिछानेले पार्टीलाई वर्तमान अवस्थासम्म पु¥याउन सहयोग गर्ने केन्द्रीय समिति, नेता, कार्यकर्ता तथा सदस्यप्रति आभार व्यक्त गर्दै कार्यकालको अन्तिम केन्द्रीय समिति बैठकका अवसरमा सबैलाई शुभकामना दिनुभयो ।
रास्वपाले भरतपुरमा आफ्नो प्रथम महाधिवेशन आयोजना गर्दै नयाँ नेतृत्व चयन र संगठनात्मक संरचनालाई थप सुदृढ बनाउने तयारी गरेको छ ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.