काठमाडौं । अभिनेता अनमोल केसी र अभिनेत्री प्रिन्सी खतिवडाको प्रेमकथामा आधारित चलचित्र ‘बाटुलो जून’को ट्रेलर सार्वजनिक भएको छ। भाइटीकाको भोलिपल्ट अर्थात् कात्तिक २६ गतेबाट प्रदर्शनमा आउने तयारीमा रहेको चलचित्रको ट्रेलरले पुरानो समयको प्रेम, पारिवारिक सम्बन्ध र सामाजिक परिवेशलाई पर्दामा उतारेको संकेत गरेको छ।
बुधबार काठमाडौंमा आयोजित एक कार्यक्रमबीच सार्वजनिक गरिएको ट्रेलरमा अनमोल र प्रिन्सीको प्रेम सम्बन्धलाई प्रमुखताका साथ प्रस्तुत गरिएको छ। ३०–४० को दशकको ग्रामीण परिवेशमा निर्माण गरिएको चलचित्रमा अनमोल काजीको भूमिकामा देखिएका छन्। गाउँमा पढाउने काम गर्ने काजीको जीवनमा प्रिन्सीको प्रवेशसँगै प्रेमकथा अघि बढ्छ।
एकअर्कालाई मन पराउने उनीहरूको सम्बन्धमा भने परिवारको असहमति बाधक बनेको छ। विशेषगरी अनमोलको परिवार उनीहरूको प्रेम सम्बन्ध स्वीकार गर्न तयार देखिँदैन। प्रेम र पारिवारिक सम्बन्धबीचको द्वन्द्वलाई ट्रेलरमा प्रस्तुत गरिएको छ। परिवारको अवरोध पार गर्दै उनीहरूको प्रेमले सुखद मोड लिन्छ कि लिँदैन भन्ने जिज्ञासा दर्शकमा छाड्दै ट्रेलर सकिन्छ।
चलचित्रको अर्को आकर्षण अनमोल र प्रिन्सीको फरक गेटअप पनि हो। ट्रेलरमा भुवन केसी र गरिमा पन्तको युवावस्थाको भूमिकामा अनमोल र प्रिन्सीलाई प्रस्तुत गरिएको छ। बुबाको भूमिकामा देखिन अनमोलले जुँगा राखेका छन्। यसले चलचित्रमा उनको अभिनय यात्राको फरक पक्ष देखाउने संकेत गरेको छ।
ग्रामीण परिवेश, पुरानो समयको रहनसहन र प्रेम सम्बन्धलाई समेटेको ट्रेलरले चलचित्रलाई आधुनिक प्रेमकथाभन्दा फरक स्वादमा प्रस्तुत गरेको छ। विशेषगरी विगतको पुस्ताले भोगेको समय र प्रेमको अनुभूतिलाई चलचित्रले पर्दामा उतार्ने प्रयास गरेको देखिन्छ।
भुवन केसीको निर्देशनमा बनेको चलचित्रमा अनमोल केसी र प्रिन्सी खतिवडासँगै न्यान्सी खड्का, प्रकाश घिमिरे, रेअर राई, दीपक केसी, श्वेता मिश्र, लक्ष्मी गिरी, लक्ष्मीनाथ तिमिल्सिना, अमितेश शाह, शिशिर सिवाकोटी, हिना नगरकोटी र संगी अधिकारीलगायतका कलाकारको अभिनय रहेको छ।
सामिप्यराज तिमल्सेना र सरिन पोखरेलको लेखन रहेको चलचित्रका निर्माता जीया केसी र भविष्य खड्का हुन्। कात्तिक २६ गतेदेखि प्रदर्शनमा आउने चलचित्रले प्रेमकथामा रुचि राख्ने दर्शकलाई आकर्षित गर्ने अपेक्षा गरिएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.