सर्वोच्चको आदेशसँगै नेपालजञ्जबाट योगराज ढकाल पक्राउ

नमस्ते चितवन

बिहिबार, कार्तिक १६, २०८० मा प्रकाशित

कार्तिक १६ , काठमाडौँ । प्रहरीले योगराज ढकाल रिगललाई नेपालगञ्ज, न्यूरोडबाट पक्राउ गरेको छ ।सर्वोच्च अदालतले जन्मकैदको सजाय पाएका ढकाललाई आममाफी दिने सरकारको निर्णय बदर गर्दै पक्राउ गर्न आदेश दिएपछि प्रहरीले नेपालगञ्जबाट पक्राउ गरेको हो ।

न्यायाधीशहरू ईश्वरप्रसाद खतिवडा, सपना प्रधान मल्ल र डा. कुमार चुडालको इजलासले संविधान दिवसमा सरकारको सिफारिसमा राष्ट्रपतिले गरेको कैद सजाय मिनाहा गर्ने निर्णय बदर गर्ने आदेश दिएको थियो ।रिगललाई तुरुन्त पक्राउ गरेर उनको मिनाहा गरिएको कैद सजाय भुक्तानी गराउन आदेश समेत दिएको थियो ।

आफ्ना पति चेतन मानन्धरको जघन्य हत्या गर्नेलाई कैद मिनाहाको सिफारिस गर्ने मन्त्रिपरिषद् र मन्त्रिपरिषदको सिफारिस अनुसार कार्यान्वयन गर्ने राष्ट्रपतिको निर्णय खारेजीको माग गर्दै भारती मानन्धरले सर्वोच्च अदालतमा रिट दिएकी थिइन् ।

नेपालगञ्ज बजारमा खुँडा प्रहार गरेर २८ असार २०७२ मा चेतन मानन्धरको हत्या गरेको अभियोगमा रिगलमाथि थियो । उनलाई जिल्ला अदालत बाँकेका तत्कालीन न्यायाधीश विष्णु सुवेदीको इजलासले २०७६ वैशाखमा दोषी ठहर गर्दै सर्वस्वसहित जन्मकैदको सजाय सुनाएको थियो । त्यही आदेश उच्च अदालत तुलसीपुर, नेपालजञ्जले समेत सदर गरेको थियो ।