सँगै खबर आयो- सिक्वेललाई डेब्यू निर्देशकले निर्देशन गर्नेछन् । अक्सर सिक्वललाई पुरानै निर्देशकले निर्देशन गर्छन् यसको हकमा भने निर्देशक नयाँ हुने भए ।
त्यसैले धेरैलाई संशय छ, के यी निर्देशकले सिनेमाको पुरानो साख कायम गर्लान ? यो सिनेमा जेका लागि मनपराइएको थियो त्यो अन्तर्य बोक्न यी नव निर्देशकले सक्लान् त ?
तर धेरैलाई थाहा नहुन सक्छ यो सिनेमाबाट फिचर सिनेमामा डेब्यू गर्न लागेका निरोज महर्जन ‘रेशम फिलिली’ निर्माण प्रक्रियामा पनि संलग्न थिए । ‘त्यो टिमको सदस्य नै थिए । कहिले असिस्ट गरिराको हुन्थे । कहिले विनय दाइ (विनय श्रेष्ठ) को डायलग लेखिरा हुन्थे । त्यसमा प्रोडक्सन मेरो मामाले हेरिरहनु भा थ्यो । निर्देशक (प्रणव जोशी)सँग पहिलेदेखि चिनेको तथा काम गरिरहेको थिए नै । म्यूजिक भिडियोहरुमा सँगै काम गरिरहेका थियौं । त्यो सिनेमामा एउटा सानो भूमिका पनि गरेको छु’, उनले भने ।
सिनेमाका सिक्वेलको खासियत भनेको के हो भने त्यो पहिलो जस्तो दोश्रो वा तेश्रो कहिल्यै हुँदैन । त्यस्तोमा उनले यही सिनेमालाई डेब्यू सिनेमा किन बनाए त ?
उनी भन्छन्- ‘सबै कुरा जुर्दै गयो । हामी सिनेमा गर्ने भनेर हिँडिराथियौं । मलाई सिनेमामा गर्नुथियो । फेरि यो एउटा चलिसकेको नाम पनि हो । मलाई लाग्यो – डेब्यूका लागि यो भन्दा अर्को उत्कृष्ट अवसर होला र भयो। त्यसका अलावा पूर्णरुपमा यो कथा मेरो हो । मलाई भन्न मन लागेको कथा । फिलिलीको दुनियाँमा मिलेको कथा भएर गरेको हुँ।’
त्यसैले उनी आफ्नो सिनेमाले सिक्वेलका रुपमा दर्शकलाई धोका नहुने ठान्छन् । उनलाई यो सिनेमाबाट पहिलो सिनेमाको निर्देशक भन्दा ‘स्ट्याण्डआउट’ हुनुपर्ने चुनौती छ । यसमा उनी आशावादी सुनिए।
‘त्यही उदेश्यले नै गरेको हो । गीत, टिजर र ट्रेलर आइसकेको छ । यसले त्यो चुनौतीलाई राम्रो प्रतिक्रिया दिइरहेको प्रतिक्रिया पाइरहेको छु । अब स्ट्याण्डआउट कुन रुपमा कसरी हुन्छ सिनेमा रिलिजपछि दर्शकहरुले अझ स्पष्टरुपमा भन्नुहुनेछ । तर यो सिनेमामा मलाई भन्न मन लागेको कथा भनेको छु, जुन सिनेमा आएपछि देखिने नै छ ।’
यो सिनेमाले दर्शकलाई वाचा गर्ने भनेको हाँसोको भरपुर मनोरञ्जन हो । सिनेमामा दुई मूल पात्र छन् – रेशम र हरिया , जहाँ हरियाले रेशमलाई आफ्नो बचपना हर्कतले हरदम समस्यामा पारिरहन्छ । यही कुराले सिनेमाको कथालाई कमेडीको उचाइमा लादैं दर्शकलाई मनोरञ्जनको डोज पस्कन्छ ।
नव निर्देशक यो मामिलामा कुन रुपमा प्रस्तुत होलान ? उनी माथि यो सिनेमालाई लिएर उठ्ने एउटा अर्को प्रमुख प्रश्न हो ।
‘यो कुरामा म विश्वस्त छु । पहिलेको जस्तै अहिलेकोले पनि दर्शकलाई हँसाउनेछ । त्यसका अलवामा मैले टिजर ट्रेलरमा मैले ‘नट जस्ट अ कमेडी’ भनेर बकाइदा लेखिदिएको छु । यसमा कथा छ जसले सन्देश पनि दिन्छ । कमेडीको साथमा ड्रामा पनि छ। म त यसलाई अझ कमेडी-ड्रामा भन्न रुचाउँछु । निश्चित रुपमा यो पहिलो भन्दा फरक छ ।’
यस्तो आत्मविश्वासमा रहेका निरोज अगाडि भन्छन् – पहिलोभन्दा कथाका हिसाबले यो अझ राम्रो छ । दर्शकले यसलाई स्वीकार गर्नुहुनेछ । विषय र मुद्धामा अगाडि छ यो सिनेमा।
निरोज आफ्नो यो सिनेमाले पुरानो नोस्टालजियालाई अनुभूत गराउने बताउँछन् । सिनेमाले रेशम र हरियाको मित्रताका माध्यमबाट दर्शकलाई मनोरञ्जन दिदैं जसरी अहिलेको नेपाली समाजले विकशित मुलुक जानेलाई रोमान्टिसाइज गर्ने र खाडी मलेसियामा जानेप्रति राख्ने इत्तर दृष्टिकोण राख्छ यही कथा यसले भन्छ।
यसैगरी निरोज यो सिनेमालाई पहिलेको कथाको निरन्तरता भन्दा पनि रेशम र हरिया पात्रको मित्रताको नोस्टालजियामा भनिएको फरक परिवेशको कथा भन्न रुचाउँछन् ।
‘रेशम र हरियाको मित्रताको नोस्टालजिया यसले बोक्छ । त्यसका अलावा सिनेमाले पूर्णतया नयाँ विषय र कथा प्रस्तुत गर्छ।’
रिलिज मिति नजिकिदैं गर्दा एक खालको ‘फिङ्गर क्रस’ स्थितिमा रहेका निरोज ‘पहिलो राम्रो कि अब तपाईंले ?’ भन्ने प्रश्नमा उनले त्यसको जवाफ दर्शकले दिने बताउँछन् । यध्यपी उनले दुबै सिनेमा आफ्ना हिसाबले फरक भएको कुरालाई पुनः जोड दिए ।
‘पहिलो सिनेमामा स्ल्यापेस्टिक अप्रोजमा थियो, यो धेरै ड्रामामा केन्द्रित छ । हामीले यसमा कन्टेन्ट बलियो बनाउन खोजेको छौं । कमेडी त छँदैछ तर विषयका हिसाबले हेर्ने हो भने यो बढि बलियो छ’, उनी भन्छन् ।
सिनेमा फागुन १४ गते शिवरात्रीका दिनमा रिलिज हुँदैछ। सिनेमाले आफ्नो आकार प्रकार धारण गरिसकेको छ । यो सिनेमालाई लिएर उनी ढुक्क छन्। लेख्दा जुन दुनियाँको कल्पना उनले कल्पना गरेका थिए, त्यो पर्दामा मुखरित भएको उनले पाएका छन् । सिनेमाबाट नयाँ निर्देशकका रुपमा चिनिनेमा निरोज ढुक्क देखिए ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.