नायक अनमोल केसी ‘म्युजिकल हंगामा २०२५’ मा प्रस्तुति दिन कतार जाने

नमस्ते चितवन

बिहिबार, जेठ ०१, २०८२ मा प्रकाशित

काठमाडौं ,जेठ ०१
नायक अनमोल केसी पछिल्लो समय दर्शकसँग भेटघाटको कार्यक्रम गरिरहेका छन् । सार्वजनिक कार्यक्रमहरुमा त्यति देखा नपर्ने केसी अब भने बिस्तारै देखा पर्न थालेका छन् ।

अनमोल कतारको दोहास्थित एशियन टाउन एम्फीथिएटरमा हुने ‘म्युजिकल हंगामा २०२५’ मा आफ्नो प्रस्तुति दिन जाने भएका छन् । १५ हजार दर्शक क्षमता रहेको उक्त थियटरमा अनमोल ‘म्याडी लुक्स’ मा प्रस्तुत दिने बताईएको छ ।

अनमोलको ‘मिट एन्ड ग्रिट’ ले उक्त कार्यक्रमलाई अझ रमाइलो र मनोरञ्जनात्मक बनाउने विश्वास गरिएको छ । रामी प्रोडक्सनको आयोजनामा हुने कार्यक्रममा अनमोललाई ‘लोकप्रिय अभिनेता’ को उपाधिसहित सम्मान समेत गरिने बताईएको छ । कार्यक्रम विशेषगरी नेपाली र भोजपुरी दर्शकहरूलाई लक्षित गरिएको छ ।अनमोल अभिनित उनको ‘जेरी अन टप’ आगामी असोज ३१ मा प्रदर्शन हुँदैछ भने उनले छिटै होम प्रोडक्सनको फिल्ममा काम गर्नेछन् ।

आउँदो जुन ६ मा हुने उक्त कार्यक्रममा भुवन केसी, अनमोल केसी, स्वस्तिमा खड्का, अस्मिता अधिकारी, पल शाह, जिया केसीसँगै भोजपुरी गायक तथा अभिनेता खेसारीलाल यादवले आफ्नो ब्याण्डसहित प्रस्तुती दिनेछन् ।