कार्यालय प्रमुख ई. कण्ठले आगजनीले सिंहदरबारको पश्चिमी मोहडाको भवनमा रहेका पुरातात्त्विक महत्वका सामग्रीसमेत जलेर नष्ट भएको बताउनुभयो । उहाँले भन्नुभयो, “पुरातात्त्विक महत्वका सामान भूकम्पबाट भएको क्षतिपछि पनि जोगाउन सफल भएको थियो । तर अहिले सबै जलेर काम नलाग्ने अवस्थामा पुगेका छन् । त्यस्ता सामग्री भूकम्पको बेला भुइँमा झरेको मात्र थियो । केही फुटेका थिए तर अहिले त सबै खरानी भएका छन् ।”

उहाँका अनुसार काठका दलिन जलेर खरानी बन्दा बेलायती बैठक कक्षलगायतका कोठाको छत खसेका छन् भने सो कक्षमा बिछ्याइएको मुलुकको अहिलेसम्मकै सबैभन्दा चौडाइ भएको गलैँचा खरानी भएका छन् । विश्वको विभिन्न मुलुकबाट ल्याइएका उपहार, कलाकृति, पुराना फाटोग्राफी, राणाकालीन बहुमूल्य पियानो, विभिन्न कलाकृति कुँदिएका सिसा, पेन्टिङ र पुराना घडीलगायतका सामग्री नष्ट भएका छन् । उहाँले भन्नुभयो, “आगोले यति नराम्रो गरी डढेको छ कि अहिले सिंहदरबारभित्र कुनै संरचनाको अडेस वा समातेर उक्लिन सक्ने अवस्था छैन ।”

स्वरूपमा परिवर्तन नगरी पुनर्निर्माण

कठिन, चुनौतीपूर्ण र खर्चिलो भए पनि क्षतिग्रस्त सिंहदरबारको पुनर्निर्माण सम्भव रहेको उहाँले बताउनुभयो । उहाँले भन्नुभयो, “सिंहदरबार पुरातात्त्विक र ऐतिहासिक महत्वको सम्पदा रहेका कारण यसलाई भत्काउन मिल्दैन । त्यही भएर यसको पुनर्निर्माण (प्रबलीकरणै) गर्नुपर्ने छ । सिंहदरबारको पहिलेको स्वरूपमा परिवर्तन नहुने गरी पुनर्निर्माण गरिने उहाँले स्पष्ट पार्नुभयो ।

विक्रम संवत् १९६० मा तत्कालीन प्रधानमन्त्री चन्द्रशमशेर जबराको कार्यकालमा निर्मित ऐतिहासिक सिंहदरबार भवन एक अत्यन्तै कलात्मक, युरोपमा विकास भएको ‘नियो क्लासिकल’ शैलीको नेपालको मुख्य प्रशासनिक भवन हो । प्रधानमन्त्री चन्द्रशमशेरले आवश्यक सामग्री बेलायतबाट झिकाई आफ्नो निजी निवासका रूपमा युरोपेली शैलीमा सिंहदरबार निर्माण गर्न लगाउनुभएको थियो । वास्तुकला तथा ललितकलाका दृष्टिकोणले अनुपम तहखानासहित पाँचतले भवनका विशेषतः चार वटा महत्वपूर्ण भाग छन् । उत्तर, दक्षिण र पूर्व मोहडा खण्डको जम्मा निर्माण भएको क्षेत्रफल (टोटल बुल्ट अप एरिया) १२ हजार ४६१.८१ वर्गमिटर छ ।