बल प्रयोग नगरी सुकुम्बासी स्थानान्तरण गरिने: प्रधानमन्त्री शाह

नमस्ते चितवन

शुक्रबार, बैशाख ११, २०८३ मा प्रकाशित

काठमाडौं । प्रधानमन्त्री बालेन्द्र शाहले काठमाडौं उपत्यकाका खोला किनारमा रहेका सुकुम्बासी बस्ती व्यवस्थापनबारे स्पष्ट धारणा सार्वजनिक गरेका छन्। उनले बाढी र डुबानको जोखिमलाई मध्यनजर गर्दै जोखिमयुक्त बस्तीहरूलाई सुरक्षित स्थानमा सार्ने योजना अघि बढाइएको बताएका हुन्।

सामाजिक सञ्जालमार्फत आफ्नो धारणा राख्दै प्रधानमन्त्री शाहले वर्षेनी दोहोरिने बाढी समस्याले हजारौं नागरिक प्रभावित हुने गरेको उल्लेख गरेका छन्। यस समस्यालाई दीर्घकालीन रूपमा समाधान गर्न आवश्यक कदम चाल्ने समय आएको उनको भनाइ छ।

उनका अनुसार नदी किनारमा अनियन्त्रित बसोबासका कारण पानीको बहावमा अवरोध पुग्ने मात्र होइन, ढल निकास प्रणालीमा समेत समस्या सिर्जना हुँदै आएको छ। यसले उपत्यकाको वातावरणीय सन्तुलनमा समेत असर पारिरहेको उनले बताएका छन्।

सरकारले थापाथली, गैरीगाउँ र मनोहरा क्षेत्रका जोखिमपूर्ण बस्तीहरूलाई बल प्रयोग नगरी मानवीय तरिकाले स्थानान्तरण गर्ने तयारी गरेको जनाएको छ। यसका लागि सम्बन्धित नागरिकसँग समन्वय गर्दै सुरक्षित बसोबासको व्यवस्था गरिने उल्लेख गरिएको छ।

प्रधानमन्त्री शाहले सुकुम्बासी समस्या समाधानलाई प्राथमिकतामा राखिएको जनाउँदै देशभरका वास्तविक सुकुम्बासीको पहिचान गरी आवश्यक प्रक्रिया पूरा गरेर जग्गा वितरण गर्ने योजना समेत अघि सारिएको बताएका छन्।

उनले काठमाडौं उपत्यकाका नदीकिनारका बस्ती र देशका अन्य सुकुम्बासी समस्यालाई फरक–फरक ढंगले सम्बोधन गरिने स्पष्ट पारेका छन्। दीर्घकालीन समाधानमार्फत वर्षौं पुरानो समस्या अन्त्य गर्ने लक्ष्य सरकारको रहेको उनले विश्वास व्यक्त गरेका छन्।