काठमाडौँ, असार १४ गते । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ ले हतारोमा पार्टी एकता गर्ने र फुर्सदमा फेरि विभाजन भएर रोएर बस्ने दिन नआओस् भनेर सतर्क हुनुपर्ने बताउनुभएको छ।
जननेता मदन भण्डारीको ७५ औँ जन्मजयन्तीका अवसरमा काठमाडौँमा आयोजित ‘नेपालको कम्युनिष्ट आन्दोलन र जननेता मदन भण्डारी’ विषयक राष्ट्रिय गोष्ठीमा उहाँले सो कुरा बताउनुभएको हो।
गोष्ठीलाई सम्बोधन गर्नुहुँदै संयोजक प्रचण्डले भन्नुभयो, “हामीले आज फेरि एकचोटि कम्युनिस्ट आन्दोलनलाई एकताबद्ध गर्न त्यसको समीक्षा भने गर्नैपर्छ भन्ने पक्षमा म पनि छु। बिनासमीक्षा हतारोमा पार्टी एकता गर्ने र फुर्सदमा फेरि विभाजन भएर रोएर बस्ने अवस्था नआओस् भनेर हामी सबै सतर्क हुनुपर्छ। हामीले आफ्नै आत्मसमीक्षा गर्ने कुरामा दृढ हुनैपर्छ।”
निरंकुश सामन्तीतन्त्रविरुद्ध विगतमा एकताबद्ध भएर लडेको स्मरण गर्नुहुँदै उहाँले मिलेर मात्र सफलता प्राप्त गर्न सकिने प्रस्ट पार्नुभयो। उहाँले भन्नुभयो, “जसरी हामी निरंकुश सामन्तीतन्त्रविरुद्ध मिलेर लड्यौँ, त्यतिबेला हाम्रो पार्टी त एउटै थिएन नि। तर, हामी मिलेर नै सफलता प्राप्त गरेका हौँ। अहिले पनि मिलेर मात्र सफलता प्राप्त गर्न सकिन्छ, यसमा ढिला नगरियोस्।”
यसअघि २०७४ सालमा भएको एकतालाई नेपाली जनताले झण्डै दुईतिहाइ मत दिएर अनुमोदन गरेको पनि उहाँले स्मरण गर्नुभयो। जननेता मदन भण्डारीसँग त्यो समयमा पनि कम्युनिस्ट आन्दोलन एकताबद्ध गर्ने सम्बन्धमा घनीभूत छलफल भएको तर त्यसलाई औपचारिकता दिन नपाउँदै दुःखद् घटना भएको उहाँले उल्लेख गर्नुभयो।
संयोजक प्रचण्डले विगतको प्रसङ्ग जोड्नु हुँदै भन्नुभयो, “हामीले २०४६ सालको ऐतिहासिक जनआन्दोलनले जे सन्देश दियो, वामपन्थी र नेपाली जनताले विचार मिल्नेका बिचमा एकताको माग गरेका थिए। त्यो एकताका निम्ति नेतृत्वले पहल गर्न जरुरी थियो। त्यसकारण, जेठ ३ गतेभन्दा लगत्तै पछि कार्यक्रम बनाएका थियौँ। कमरेड मदन भण्डारी र म आफैँ एक दिन रातभरि बसेर के नेपाली कम्युनिस्ट आन्दोलनलाई यो २०४६ सालको जनआन्दोलनको पृष्ठभूमिमा एकताबद्ध गर्न सम्भव छ भन्ने बारेमा बहस गर्ने भनेर कार्यक्रम तोकिएको थियो। तर, दुर्भाग्य त्यो दिन आउन पाएन।”
त्यो अधुरो सपना पूरा गर्ने जिम्मेवारी कहीँ न कहीँ आफ्नो काँधमा रहेको भन्दै उहाँले यो वर्तमानका सबै कम्युनिष्ट घटकको साझा जिम्मेवारी भएको धारणासमेत व्यक्त गर्नुभयो।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.