तेस्रो चरण अन्तर्गत प्रतिकार्य तथा पृष्ठपोषण (पुनस्र्थापना तथा राहत) का लागि स्थानीय प्रशासन, जिल्ला विपत् व्यवस्थापन समिति तथा जिल्ला सुरक्षा समितिसँग समन्वय गरी सबै सैनिक युनिटलाई चौबिसै घण्टा परिचालन गर्न सकिने गरी तयारी पूरा गरिएको छ । आवश्यक परे देशका अन्य क्षेत्रमा रहेका सैनिक स्रोतसाधनसमेत प्रभावित क्षेत्रमा तत्काल परिचालन गरिने प्रवक्ता बस्नेतले जानकारी दिनुभयो । यस वर्ष पनि मौसमविद्ले मनसुन अवधिभर केही स्थानमा भारीदेखि अति भारी वर्षाको सम्भावना औँल्याएका छन् । यसलाई ध्यानमा राख्दै सरकारले विपत् प्रतिकार्यलाई उच्च प्राथमिकतामा राखेको छ  । यस वर्षको मनसुन अवधिमा देशभर ५१ हजार ८६८ घरधुरीका दुई लाख २६ हजार ६६१ जना प्रभावित हुन सक्ने अनुमान गरिएको छ । प्रभावितमध्ये ५१.१० प्रतिशत महिला र ४८.९० प्रतिशत पुरुष रहने आकलन गरिएको छ ।