रास्वपाकै कमल सुवेदीले ग्यास अभाव चर्किएको भन्दै आपूर्ति सहज बनाउन माग गर्नुभयो । अभाव कृत्रिम भएको जिकिर गर्दै उहाँले कालोबजारी गरी आपूर्ति शृङ्खला नै प्रभावित पार्ने काम भइरहेकाले तत्काल बजार अनुगमन गरी सहजीकरणको मागसमेत गर्नुभयो । शून्य समयमा सांसदहरूले ग्यास आपूर्ति सहजीकरणसँगै विपत् व्यवस्थापन र तयारीलगायतमा सरकारको ध्यानाकर्षणसमेत गराउनुभएको थियो ।

कृषकलाई खेतीको समयमा पनि रासायनिक मल उपलब्ध गराउन नसकेको भन्दै सत्तारूढ दलकै सांसदले सरकारको आलोचना गर्नुभएको छ । सत्तारूढ रास्वपाका सांसद रवीन्द्र पटेलले  पछिल्लो समय किसानले रासायनिक मल पाउन नसकेको गुनासो बढिरहेको बताउनु

भयो । कोटा प्रणालीमा आधारित भएर मल वितरण भएको र त्यसमा पनि माग अनुसार पाउन नसकेको गुनासो उहाँले गर्नुभयो ।

प्रश्नोत्तरमा रुलिङ माग 

प्रतिपक्षी दल नेपाली कम्युनिस्ट पार्टी (नेकपा) का प्रमुख सचेतक युवराज दुलालले प्रधानमन्त्रीसँग जवाफका लागि रुलिङको माग गर्नुभएको छ ।  प्रधानमन्त्री वालेन्द्र शाहको अभिव्यक्तिमा लामो समयदेखि प्रतिपक्ष दलहरूले जवाफ माग गरे पनि प्राप्त नभएको भन्दै सभामुखसमक्ष रुलिङको माग गर्नुभएको हो । राष्ट्रियताप्रतिको विवादस्पद अभिव्यक्ति रेकर्डमा राख्न उपयुक्त नहुने भन्दै दुलालले सभामुखको समेत ध्यानाकर्षण गराउनुभयो ।

सभामुखको रुलिङ

धनुषाको ढल्केबरमा प्रस्तावित ट्रमा सेन्टर अन्यत्र सार्न लागिएको भन्दै कांग्रेस सांसद चन्द्रमोहन यादवले विरोध जनाएपछि सभामुख डोलप्रसाद अर्यालले सो विषयमा जानकारी दिन रुलिङ गर्नुभएको छ । सांसद यादवले ट्रमा सेन्टर सार्नेबारे स्वास्थ्य तथा खाद्य स्वच्छतामन्त्री निशा मेहताले अभिव्यक्ति दिनुभएको भन्दै विरोध जनाउनुभएको थियो । सांसद यादव संसद्मा उभिएर विरोध जनाई अवरोधको अवस्था सिर्जना भएपछि सभामुख अर्यालले सो विषयमा सरकारको ध्यानाकर्षण गराउनुभएको हो ।

मन्त्रीको अभिव्यक्तिले स्थानीय आन्दोलित भएकाले सरकारले जवाफ दिनुपर्ने यादवको माग थियो । उहाँले ढल्केबरमै ट्रमा सेन्टर स्थापना हुनुपर्ने माग पनि गर्नुभयो । संसद्मा उभिएर अवरोध गरेको भन्दै रास्वपा सांसद मनीष खनालले सो प्रकरणमा नियमापत्तिसमेत गर्नुभएको थियो ।

प्रतिनिधि सभामा रास्वपा सांसद गजला मिकरानीले माइतीघर क्षेत्रमा विभिन्न माग राखेर हुने प्रदर्शन अन्यत्र सार्न माग गर्नुभएको छ । उहाँले माइतीघरको सट्टा अन्य क्षेत्रलाई प्रदर्शन गर्ने स्थल तोक्न माग गर्नुभयो । विभिन्न राजनीतिक तथा सामाजिक आन्दोलन पछिल्ला वर्षहरूमा माइतीघरमा केन्द्रित हुँदै आएका छन् । नियमित हुने प्रदर्शनले सर्वसाधारणलाई प्रत्यक्ष असर पारेको बताउँदै उहाँले माइतीघर अत्यधिक व्यस्त क्षेत्र रहेकाले प्रदर्शन अन्य क्षेत्रमा केन्द्रित गर्नुपर्ने धारणा राख्नुभयो ।

सभामा विधेयक पेस

सभामा राज्य व्यवस्था तथा सुशासन समितिका सभापति हरि ढकालले नेपाल विशेष सेवा ऐन, २०४२ को साबिकको व्यवस्था जगाउनेसम्बन्धी विधेयकमा समितिको प्रतिवेदन पेस गर्नुभएको छ । राष्ट्रिय अनुसन्धान विभागलाई प्रधानमन्त्री कार्यालय मातहत ल्याउने गरी उक्त विधेयक ल्याइएको हो । समितिको प्रतिवेदनसहितको विधेयक अब सभामा पारितको प्रक्रियामा जाने छ ।

यस्तै सभामा प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोबिता गौतमले संवैधानिक निकायका पदाधिकारीहरूको पारिश्रमिक, सेवाको सर्त र सुविधासम्बन्धी (पहिलो संशोधन) विधेयक प्रस्तुत गर्नुभएको छ । यस्तै परराष्ट्रमन्त्री शिशिर खनालले राहदानी (पहिलो संशोधन) विधेयक प्रतिनिधि सभामा पेस गर्नुभएको छ । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता वादीले मानव बेचबिखन तथा ओसारपसार (नियन्त्रण) संशोधन विधेयक प्रतिनिधि सभामा पेस गर्नुभएको छ ।