काठमाडौं । दसैँको अवसर पारेर नेपाली हलमा प्रदर्शनमा आएका तीन चलचित्रमध्ये ‘आ बाट आमा २’ बक्स अफिसमा सबैभन्दा अगाडि देखिएको छ। चलचित्र विकास बोर्डले सार्वजनिक गरेको बक्स अफिस रिपोर्टअनुसार ‘छ माया छपक्कै २’ दोस्रो स्थानमा रहँदा ‘१२ गाउँ २’ तेस्रो स्थानमा छ।
दसैँको बिदालाई लक्षित गर्दै यसपटक दर्शकमाझ लोकप्रियता हासिल गरेका चलचित्रका सिक्वेलहरू प्रदर्शनमा आएका थिए। आइतबार राति ११ः५९ बजेसम्मको व्यापारलाई समेटेर बोर्डले सार्वजनिक गरेको विवरणअनुसार तीनवटै चलचित्रले फरक–फरक व्यापार गरेका छन्।
बक्स अफिस रिपोर्टअनुसार ‘आ बाट आमा २’ ले ४ करोड ११ लाख ४६ हजार ८४८ रुपैयाँ ग्रस कलेक्सन गरेको छ। उक्त अवधिमा चलचित्रलाई १ लाख ३१ हजार ४९१ दर्शकले हेरेका छन्। चन्द्र पन्तको निर्माण तथा निर्देशन रहेको चलचित्रमा पल शाह, विपना थापा, आकाश श्रेष्ठ, प्रदीप रावत, मलिका महत, साइग्रेस पोखरेल, सविन श्रेष्ठ, रिश्ता गुरुङ, निकिता आचार्य, गजित विष्ट, दिलीप अखेडा र नरेन खड्कालगायत कलाकारको अभिनय रहेको छ।
त्यस्तै, दोस्रो स्थानमा रहेको ‘छ माया छपक्कै २’ ले २ करोड ७६ लाख ३९ हजार ५६ रुपैयाँ ग्रस कलेक्सन गरेको छ। चलचित्रलाई उक्त अवधिमा ८२ हजार ७५९ दर्शकले हेरेका छन्। आमा सरस्वती मुभिज, रोहित अधिकारी फिल्म्स र आईएमईको संयुक्त प्रस्तुतिमा बनेको चलचित्रका निर्देशक दीपेन्द्र लामा हुन्। चलचित्रमा दीपकराज गिरी, केकी अधिकारी, सनिशा भट्टराई, कर्मा, रिहान गिरी, मेक्सम गौडेल, रमा थपलिया, प्रकाश घिमिरे र निर्मल शर्मालगायत कलाकारको अभिनय रहेको छ।
यता, अभिनेता तथा निर्देशक विराज भट्टको चलचित्र ‘१२ गाउँ २’ ले १ करोड ८३ लाख ९४ हजार ८८६ रुपैयाँ ग्रस कलेक्सन गरेको छ। चलचित्रलाई हालसम्म ५७ हजार ९८३ दर्शकले हेरेका छन्।
विराज भट्ट फिल्म प्रोडक्सनको ब्यानरमा बनेको चलचित्रमा विराज भट्ट, समीर भट्ट, कृशु शाही, अनुपविक्रम शाही, वर्षा इटानी, खुशी कार्की, प्रकाश शाह, सुनिल पोखरेल र कनिज कोइरालालगायत कलाकारको अभिनय रहेको छ। चलचित्रकी निर्माता सरस्वती भट्ट हुन्।
चलचित्र विकास बोर्डको तथ्यांकअनुसार दसैँमा प्रदर्शनमा आएका यी तीन चलचित्रमध्ये ‘आ बाट आमा २’ ले सर्वाधिक ग्रस कलेक्सन गर्दै अग्रता कायम गरेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.