आज प्रतिनिधिसभा सभामुख निर्वाचनको उमेदवारी दर्ता

माघ ४ , काठमाडौ। संघीय संसद अन्तर्गत प्रतिनिधिसभाको सभामुख चुनावका लागि आज उमेदवारी दर्ताको कार्यतालिका छ । आज सभामुखका आकांक्षीले उमेदवारी दर्ता गराउनु पर्नेछ ।दिउँसो १ बजेदेखि ४ बजेसम्म उमेदवारी दर्ताकाे समय रहेको छ । ४ः१५ बजे दर्ता गरिएका उमेदवारको नाम प्रकाशन गर्ने कार्यतालिका रहेको छ ।

तर, अहिलेसम्म पनि सभामुख दाबी गरिरहेका दलहरुले उमेदवार तय गर्न सकेका छैनन् । प्रधनमन्त्रीमा नेकपा (माओवादी केन्द्र)का अध्यक्ष पुष्पकमल दाहाल प्रचण्डसँग राष्ट्रपति र सभामुख लिने सहमति गरेको नेकपा (एमाले)ले समेत सभामुखको उमेदवार तोक्न सकेको छैन । एमालेले सभामुख कसलाई उमेदवार बनाउने औपचारिक छलफलसमेत थालेको छैन ।

संसद्को सबैभन्दा ठूलो पार्टी अनि गठबन्धन आफैसँग हुँदा व्यवस्थापकीय कुशलता देखाउन नसकेर नेपाली कांग्रेस संसद्मा प्रमुख प्रतिपक्षको भूमिकामा पुगेको छ । सत्ता गठबन्धनको घटक माओवादी प्रधानमन्त्री नपाएर एमालेसँग सहकार्य गर्दै प्रचण्ड प्रधानमन्त्री बनेपछि कांग्रेस प्रतिपक्षी भूमिकामा खुम्चिएको हो ।

सभामुख र राष्ट्रपतिमा सहयोगको अपेक्षासहित प्रधनमन्त्रीलाई विश्वासको मत दिएको कांग्रेस त्यही कारण आलोचनाको केन्द्र पनि बनेको छ । तर, उसले आफ्नातर्फबाट सभामुखमा दिने उमेदवार भने प्रस्तुत गर्न सकेको छैन ।

Global bank
प्रधानमन्त्री दाहालले भने सभामुख र राष्ट्रपतिमा पनि राष्ट्रिय सहमति जुटाउने भन्दै छलफल थालेका छन् । मंगलबार बालुवाटारमा विश्वासको मत दिएका सबै पार्टीलाई बोलाएर उनले छलफल गराएका छन् । छलफलमा कुनै सहमति हुन सकेको छैन ।

प्रधानमन्त्रीले राष्ट्रिय सहमतिको खोजी गरे पनि एमाले भने आफूले पाउने भनेका पद छोड्ने पक्षमा देखिएको छैन । उसले कांग्रेसका लागि पद छुट्टाउनुपर्ने कुनै कारण नरहेको भन्दै कांग्रेसले राष्ट्रहितमा योगदान नै गर्न चाहेको भए प्रतिपक्षकै भूमिकामा गर्नुपर्ने धारणा राखेको छ ।

एमालेमा उपमहासचिव पृथ्वीसुब्बा गुरुङ, सचिव छविलाल विश्वकर्मा, स्थायी कमिटी सदस्य देवराज घिमिरे र सांसद विद्या भट्टराई सभामुखका आकांक्षीका रुपमा देखिएका छन् ।

पूर्वसभामुखसमेत रहेका दलका उपनेता सुवासचन्द्र नेम्वाङलाई सभामुखमै दोहोरिन प्रस्ताव आए पनि उनले त्यो प्रस्ताव अस्वीकार गरिसकेका छन् । त्यसैले बाँकी चारजना आकांक्षीमध्ये को उमेदवार हुन्छ भन्ने एमालेकै नेताहरुलाई पनि थाहा छैन । तर, ओलीले भने आफ्नै जिल्लाका नेता देवराज घिमिरेलाई उमेदवार बनाउन छलफलसमेत नगरेका एमाले नेताहरुको बुझाइ छ ।

स्रोतका अनुसार ओलीसँग भेट गर्न पुगेका पृथ्वीसुब्बा गुरुङलाई ओलीले सभामुखको रेसमा नलाग्न सुझाव दिएका छन् । उनले झापा–२ बाट निर्वाचित घिमिरेलाई अघि बढाउने संकेत दिएपछि गुरुङले आफूले कुनै प्रतिवाद नगरेको बताएका छन् ।

बुधबार, माघ ०४, २०७९ मा प्रकाशित