नवलपुरको त्रिभुवन माविबाट एसएलसी अध्ययन गरेकी उनले मकवानपुर बहुमुखी क्याम्पसबाट समाजशास्त्रमा एम ए र हरि खेतान बहुमुखी क्याम्पस वीरगञ्जबाट एलएलबी सम्मको अध्ययन गरेकी छन्। पढाइसँगै राजनीतिक जीवनलाई निरन्तरता दिँदै आएकी लामा २०५२ सालमा एमाले निकट अनेरास्ववियु मकवानपुरको जिल्ला कोषाध्यक्ष समेत भएकी थिइन्।

लामा २०७१ सालमा तत्कालीन एमाले मकवानपुरको उपसचिवमा निर्वाचित भएकी थिइन्।पार्टीमा उनले विद्यार्थी इञ्चार्जको भूमिकामा रहेर काम गरेकी छन्। उनी २०७१ सालमै अखिल नेपाल महिला संघको जिल्ला सचिव भइन्।

२०७२ सालमा नेपाल लोकतान्त्रिक आदिवासी जनजाति महासंघको केन्द्रीय सदस्यसमेत भएकी लामा आदिवासी जनजाति जिल्ला समन्वय समिति मकवानपुरको उपाध्यक्ष पनि बनिन्।

राजनीति क्षेत्रमा क्रियाशिल लामा २०७४ को स्थानीय तहको निर्वाचनमा हेटौँडा उपमहानगरपालिकाको उपप्रमुखको रुपमा विजय हाँसिल गरेकी हुन्।राजनीतिसँगै सामाजिक क्षेत्रमा पनि लामाको बाक्लो सहभागिता थियो। लामासँग बाल विकासको क्षेत्रमा दश वर्षसम्म काम गरेको अनुभव छ।