शुक्रबार नेपाल आइपुग्दै एन्जिला, हलहलमा पुगेर दर्शक भेट्दै

नमस्ते चितवन

बिहिबार, चैत १४, २०८१ मा प्रकाशित

चलचित्र ‘अञ्जिला’को प्रचारमा अब यो सिनेमाकी मुख्य पात्र एन्जिला तुम्बाप्पो सुब्बा आफै हिँड्ने भएकी छन् ।

यसका लागि उनी नेपाल आउँदै छिन् । स्रोतका अनुसार उनी यही शुक्रबार नेपाल आइपुग्नेछिन् । तर उनी लामो समय भने नेपालमा बस्ने छैनन् । म्याच चलिरहेकाले उनी मंगलबार नै ग्रिस फर्किनेछिन् । करिब पाँच दिन नेपाल रहँदा उनी काठमाडौंदेखि मोफसलका हलसम्म पुगेर दर्शकलाई भेट्नेछिन् । उनी आएपछि चलचित्रले थप दर्शक तान्ने विश्वासमा निर्माणपक्ष रहेको छ । त्यसैले ग्रिसमा रहेर क्लब फुटबल खेलिरहेकी एन्जिलालाई निर्माणपक्षले पाँच दिनका लागि मात्रै भए पनि झिकाउन लागेको हो ।

यूके र नेपालमा भएका कुनै पनि प्रिमियरमा उनी सहभागी हुन सकेकी छैनन् । त्यसैले चलचित्रर्की मुख्य कलाकार बिना नै निर्माणपक्षले चलचित्रको प्रचार गरिरहेको छ ।

‘अञ्जिला’ राष्ट्रिय महिला फुटबल क्लबकी कप्तान तथा गोलरक्षक एन्जिला सुब्बोको बायोपिक हो । यसमा उनको बाल्यकालदेखि खेल जीवनसम्मको सङ्घर्ष र सफलताको भावुक कथा प्रस्तुत गरिएको छ । १३ दिनमा आठ करोड ७ लाख रुपैयाँ यो चलचित्रले ग्रसकलेक्सन गरिसकेको छ । चैत २९ गते रिलिज भएको चलचित्र ‘अञ्जिला’ अहिले उच्च अकुपेन्सीसहित चलिरहेको छ ।

चलचित्रका निर्माता प्रेमकुमार श्रेष्ठ हुन् । मिलन चाम्सले निर्देशन गरेको चलचित्रमा एन्जिलाको साथमा प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारको अभिनय रहेको छ ।