सामाजिक विषयवस्तुमा निर्माण हुने चलचित्रको लेखन तथा निर्देशन विकास सुवेदीले गर्नेछन्। निर्देशक सुवेदीका अनुसार साहारा अडिसनमार्फत चलचित्रमा छनोट भएकी हुन्। चलचित्रको कथाअनुसार हिन्दी लवज भएकी अभिनेत्री आवश्यक भएकाले साहारालाई छनोट गरिएको उनको भनाइ छ।

चलचित्रमा औपचारिक रूपमा जोडिनुअघि साहाराले अभिनेता विवेक ओबेरोय तथा ‘तारे जमिन पर’का लेखक अमोल गुप्तेसँग आशीर्वाद लिएकी थिइन्। कार्यक्रममा ओबेरोयले चलचित्रको सफलताको शुभकामना दिँदै निर्देशक सुवेदी र निर्माता भुसाललाई धन्यवाद दिए।

यसअघि नै चलचित्रको मुख्य भूमिकामा अभिनेता प्रदीप खड्का अनुबन्धित भइसकेका छन्। प्रदीपको जोडीका रूपमा साहाराले अभिनय गर्नेछिन्।

किङडम नेटवर्कको ब्यानरमा निर्माण हुने चलचित्रको छायांकन आगामी नोभेम्बर–डिसेम्बरमा नेपालका जुम्ला र काठमाडौं तथा भारतका मुम्बई र केदारनाथका विभिन्न स्थानमा गरिने निर्माता भुसालले जानकारी दिएका छन्।

कर्णाली फिल्म फेस्टिभलका क्रममा चलचित्रको छायांकन कर्णालीमा गर्ने सम्झौता भएको थियो। सोही सम्झौताअनुसार फेस्टिभलका निर्देशक चक्रबहादुर चन्दको संयोजनमा मुम्बईमा चलचित्र निर्माणको औपचारिक घोषणा गरिएको हो।