युद्धविराम सकिएलगत्तै गाजामा इजरायलको आक्रमण, १७८ जनाको मृत्यु

नमस्ते चितवन

शनिबार, मङि्सर १६, २०८० मा प्रकाशित

काठमाडौँ , मंसिर १६
इजरायल र हमासबीच अस्थायी युद्धविराम समाप्त भएसँगै फेरि द्वन्द्व शुरु भएको छ । युद्धविराम थप गर्ने प्रयास गरिए पनि युद्धरत दुबैपक्षले एक अर्कालाई दोषारोपण गर्दै समय विस्तार गर्न सहमत हुन नसकेको बताएका छन् ।

युद्धविराम थप गर्ने विषयमा कतारमा भएको वार्ता असफल भएको हो । द्वन्द शुरु भएकै दिन हिजै गाजामा १ सय ७८ जना मानिसको मृत्यु भएको गाजास्थित हमासद्धारा संचालित स्वास्थ्य मन्त्रालयले जनाएको छ ।

युद्धविरामको अवधि सकिए लगत्तै इजराइलले बमबारी शुरु गरेको बताइएको छ । इजरायली सेनाले २ सय आतंकवादीलाई लक्षित गर्दै प्रहार गरेको जनाएको छ ।

इजरायलले दक्षिणी गाजाका केही क्षेत्रका बासिन्दालाई इजिप्टको सिमाना नजिकैको रफाहतर्फ र दक्षिणतर्फ जान पर्चाहरु खसालेको छ । हिजो इजरायलका केही भागहरुमा पनि साइरनको आवाज सुनिएको छ । गाजाबाट प्रहार गरिएका रकेटहरुलाई इजरायलले बीचमै रोकेको छ ।

गत अक्टोबर ७ मा इजरायलमा हमासले गरेको आक्रमणमा १ हजार २ सय मानिस मारिएका थिए भने २ सय ४० जनालाई बन्धक बनाएको थियो । बन्धक बनाएकामध्ये हालै भएको युद्धविरामको अवधिमा करिब १ सय जना मुक्त भएका छन् ।

इजरायलले हमासविरुद्ध शुरु गरेको जवाफी कारवाहीमा हालसम्म १४ हजार ८ सयभन्दा बढी मानिस मारिएका छन् । मारिनेमा ६ हजारभन्दा बढी बालबालिका रहेका छन् ।