सातै प्रदेशमा सत्ता समीकरण फेरिने संकेत, कांग्रेसले तोड्यो एमालेसँगको सहकार्य

नमस्ते चितवन

बुधबार, असार ३१, २०८३ मा प्रकाशित

काठमाडौं । नेपाली कांग्रेसले सातै प्रदेशमा नेकपा (एमाले)सँगको सत्ता सहकार्य अन्त्य गर्ने निर्णय गरेको छ। पार्टीभित्रको छलफलपछि एमालेसँगको गठबन्धन तोडेर नयाँ राजनीतिक समीकरणतर्फ अघि बढ्ने निष्कर्षमा कांग्रेस पुगेको हो।

कांग्रेसका एक पदाधिकारीका अनुसार एमालेसँगको वर्तमान सहकार्यलाई निरन्तरता नदिने सहमति बनेको छ। उनले अब नयाँ राजनीतिक समझदारीका आधारमा प्रदेश सरकार गठनको प्रक्रिया अगाडि बढाइने बताए।

उनका अनुसार जेन–जेड आन्दोलनप्रति एमालेले लिएको दृष्टिकोण, प्रदेश सरकार सञ्चालनको शैली तथा सहकार्यका क्रममा देखिएका असन्तुष्टिहरू गठबन्धन अन्त्य गर्ने निर्णयका प्रमुख कारण बनेका हुन्।

निर्णयसँगै कांग्रेसले एमालेसँग संयुक्त रूपमा सञ्चालन भइरहेका प्रदेश सरकारबाट आफ्ना मन्त्रीहरू फिर्ता बोलाउने तयारी गरेको छ। यसक्रममा कर्णाली प्रदेश सरकारमा सहभागी कांग्रेसका मन्त्रीहरूले बुधबार सामूहिक राजीनामा दिएका छन्। त्यस्तै, सुदूरपश्चिम प्रदेशका मुख्यमन्त्री कमलबहादुर शाहले पनि सोही दिन सरकारमा रहेका एमालेका मन्त्रीहरूलाई पदमुक्त गरेका छन्।

एमालेसँगको सहकार्य अन्त्य गरेपछि कांग्रेसले अब नेकपासँग नयाँ सत्ता समीकरणको सम्भावनाबारे छलफल सुरु गरेको छ। पार्टी स्रोतका अनुसार सातै प्रदेशमा आपसी समझदारीका आधारमा सरकार गठन र नेतृत्व बाँडफाँट गर्ने विषयमा गृहकार्य भइरहेको छ। यदि सहमति हुन नसके विपक्षमा बस्ने विकल्प पनि खुला राखिएको छ।

यसैबीच, मंगलबार कांग्रेसका सभापति गगन थापा र नेकपा अध्यक्ष पुष्पकमल दाहाल ‘प्रचण्ड’बीच भएको भेटवार्तामा पनि नयाँ राजनीतिक समीकरण र प्रदेश सरकारको भावी संरचनाबारे विस्तृत छलफल भएको बताइएको छ।