तर, थप कर्मचारी खटाउने तयारी भइरहे पनि आवास तथा भौतिक पूर्वाधारको अभावका कारण व्यवस्थापनमा चुनौती रहेको चुडालले बताउनुभयो।

यसैगरी, न्हेचुङस्थित प्लान्ट क्वारेन्टाइन कार्यालयमा पनि कर्मचारी थपिएका छन्। कृषि, वन तथा पर्यावरण मन्त्रालयअन्तर्गतको प्लान्ट क्वारेन्टाइन तथा विषादी व्यवस्थापन केन्द्रले तीन जना कर्मचारी मुस्ताङ पठाएको छ।

क्वारेन्टाइन कार्यालयकी निमित्त प्रमुख एवं प्राविधिक सहायक बन्दना घर्तीमगरका अनुसार तीन जना कर्मचारी जोमसोम आइपुगेका छन्। केन्द्रले एक जना वरिष्ठ बाली संरक्षण अधिकृत र एक जना कम्प्युटर अपरेटरसहित कर्मचारी काजमा पठाएको हो।

विसं २०६२/६३ मा स्थापना भएको क्वारेन्टाइन कार्यालयमा पाँच जनाको दरबन्दी रहे पनि हाल एक जना प्राविधिक सहायक मात्रै कार्यरत थिए। आवश्यक जनशक्ति र क्वारेन्टाइन परीक्षणका उपकरणको अभावका कारण कार्यालयलाई प्रभावकारी रूपमा सञ्चालन गर्न कठिनाइ हुँदै आएको थियो।

रसुवागढी–केरुङ नाका बन्द भएपछि त्यहाँबाट कोरला नाकातर्फ पठाइएका सयौँ कन्टेनरमा रहेका फलफूललगायत कृषि उपजको क्वारेन्टाइन परीक्षण गर्नुपर्ने भएपछि थप जनशक्ति पठाइएको हो।

भन्सार प्रमुख चुडालका अनुसार रसुवागढी नाका बन्द भएपछि कोरला नाकाबाट मालवस्तु पैठारीका लागि दैनिक ५० भन्दा बढी कन्टेनर आउन थालेका छन्। यससँगै भन्सार तथा क्वारेन्टाइन कार्यालयको कामसमेत बढेको छ।

कोरला नाकामा बढ्दो व्यापारिक गतिविधिलाई व्यवस्थित गर्न भन्सार र क्वारेन्टाइन कार्यालयमा जनशक्ति थपिएसँगै सेवा प्रवाह तथा मालवस्तु परीक्षण प्रक्रिया थप प्रभावकारी हुने अपेक्षा गरिएको छ।