नालामा पुरिएर तीन मजदुर महिलाको मृत्यु

नमस्ते चितवन

शुक्रबार, असार ०१, २०८१ मा प्रकाशित

नवलपुर सदरमुकाम कावासोतीको फलफूल चोकमा नाला खन्ने क्रममा पुरिएर तीन जना महिला मजदुरको मृत्यु भएको छ ।

मृत्यु हुनेमा कावासोती नगरपालिका ५ लक्ष्मीनगर बस्ने ५१ वर्षीया सेती राना, सोही ठाउँकी २५ वर्षीया तानमाया गाहा र चमेली दर्लामी मगर रहेको जिल्ला प्रहरी कार्र्यालयका सूचना अधिकारी, प्रहरी नायव उपरीक्षक बेदबहादुर पौडेलले जानकारी दिनुभयो ।

कावासोती नगरपालिका ३ फलफूल चोकमा नगरपालिकाद्वारा ढल निकासिको हुमपाइप राख्न बनाउँदै गरेको निर्माणाधीन नालामा काम गर्ने क्रममा पुरिएर मजदुरको ज्यान गएको नवलपुर प्रहरीले जनाएको छ ।

काम गर्नेक्रममा सोही ठाउँमा खनि जम्मा पारेको माटोको ढिस्को खसेपछि ३ जना महिला खाल्डोमा पुरिएका थिए । तत्काल २ जना महिलालाई उद्धारगरी उपचारका लागि मध्यविन्दु जिल्ला अस्पताल डण्डा लगिएकोमा डाक्टरले दुई जनालाई मृत घोषण गरेका थिए । पुरिएर बेपत्ता भएकी अर्की एक महिलाको पनि मृत्यु भएको प्रहरी नायव उपरीक्षक पौडेलले बताउनुभयो ।

घटनाको विरोधमा स्थानीय र मृतकका आफन्तले कावासोती नगरपालिकाका प्रमुख विष्णु भुसालविरुद्ध नारावाजी गर्दै घर घेराउ गरेका थिए । उनीहरुले नगरपालिकाको लापरवाहीले मजदुरको ज्यान गएको आरोप लगाएका छन् । वर्खामा कावासोती डुबान हुन सक्ने भन्दै त्यसको निकासका लागि नगरपालिकाले ठूला नाला खनेर राखेको छ ।