‘कबड्डी ५’को नयाँ गीत ‘बुझ्न मलाई’ सार्वजनिक, काजीको भावनात्मक कथा प्रस्तुत

नमस्ते चितवन

बिहिबार, कार्तिक १२, २०८३ मा प्रकाशित

काठमाडौं । सफलताका साथ प्रदर्शन भइरहेको नेपाली चलचित्र ‘कबड्डी ५’को नयाँ गीत ‘बुझ्न मलाई’ सार्वजनिक भएको छ। निर्माण टोलीले बाँसुरी फिल्म्सको आधिकारिक युट्युब च्यानलमार्फत गीत सार्वजनिक गरेको हो।

‘कबड्डी’ शृङ्खलाका मुख्य पात्र काजी अर्थात् दयाहाङ राईको यात्राबाट प्रेरित गीतमा उनको चरित्रका भावनात्मक उतारचढाव, अन्तर्विरोध र मानवीय संवेदनालाई प्रस्तुत गरिएको छ। बाहिरबाट जिद्दी र अप्रत्याशित स्वभावका देखिने काजीको मनभित्र लुकेका भावना र संवेदनालाई गीतले उजागर गरेको छ।

गायक तथा संगीतकार कालीप्रसाद बास्कोटाको शब्द, संगीत र स्वर रहेको गीतमा आशिष चित्रकारले गितार तथा अर्गन, सरिन बज्राचार्यले ड्रम्स र कृष्ण लिम्बूले बास गितारमा साथ दिएका छन्। अमूल्य श्रेष्ठले अडियोसक स्टुडियोमा गीत रेकर्ड गरेका हुन् भने बिजु कर्माचार्य रेकर्ड प्रोड्युसरका रूपमा रहेका छन्। गीतको अडियो मिक्सिङ रिकेश गुरुङले गरेका छन्।

यसअघि सार्वजनिक ‘थाक खोला’ गीतले पनि दर्शकमाझ राम्रो चर्चा बटुलेको थियो। कालीप्रसाद बास्कोटाको शब्द, संगीत र स्वर रहेको उक्त गीतमा काजी र उनका तीन सोल्टिनी मैयाँ (रिश्मा गुरुङ), मिस शान्ति (मिरुना मगर) र सिर्जना गुरुङबीचको रमाइलो नोकझोक तथा प्रेमसम्बन्धको अन्योललाई रोचक ढंगले प्रस्तुत गरिएको छ। थकाली परिवेश र मौलिक नेपाली स्वाद समेटिएको गीतले चलचित्र प्रदर्शनअघि नै दर्शकमाझ उत्साह बढाएको थियो।

गीतसँगै चलचित्रले पनि हलमा उत्साहजनक व्यापार गरिरहेको निर्माण पक्षको दाबी छ। कात्तिक ६ गतेदेखि प्रदर्शनमा आएको ‘कबड्डी ५’ले मंगलबारसम्म ७ करोड रुपैयाँभन्दा बढी व्यापार गरेको निर्देशक रामबाबु गुरुङले बताएका छन्। चलचित्रले दर्शक तथा समीक्षकबाट सकारात्मक प्रतिक्रिया पाइरहेको र अधिकांश शो हाउसफुल भइरहेको निर्माण पक्षको भनाइ छ।

निर्देशक रामबाबु गुरुङकै कथा तथा निर्देशनमा बनेको चलचित्रमा दयाहाङ राई, विजय बराल, बुद्धि तामाङ, सिर्जना गुरुङ, विपीन कार्की, रिश्मा गुरुङ, पुष्कर गुरुङ, माओत्से गुरुङ, कमलमणि नेपाल, मिरुना मगर, कविता आले, अरुणा कार्की, शिशिर बाङ्देल, विष्णु मोक्तान, प्रमिला राईलगायत कलाकारको अभिनय रहेको छ।

बाँसुरी फिल्म्सको प्रस्तुतिमा निर्माण भएको चलचित्रका निर्माता रामबाबु गुरुङ, मणिराम पोखरेल, मधु मिजार र विशाल गुरुङ हुन्। नयाँ गीत ‘बुझ्न मलाई’ सार्वजनिक भएसँगै चलचित्रको प्रचारप्रसारले थप गति लिने अपेक्षा गरिएको छ।