कालीगण्डकीको कटान राहुघाट जलविद्युत् आयोजनाको विद्युत्गृह परिसरमा समेत पुगेको छ। ४० मेगावाट क्षमताको राहुघाट जलविद्युत् आयोजनाले गत सातादेखि परीक्षण उत्पादन सुरु गरेको भए पनि बाढीका कारण परीक्षण उत्पादन केही दिनका लागि बन्द गरिएको आयोजना प्रमुख राजबहादुर विष्टले बताए।

विद्युत्गृहलाई प्रत्यक्ष क्षति नभए पनि स्वीचयार्ड नजिकसम्म नदी पुगेको छ। विद्युत्गृह र नदीबीच रहेको बेनी–जोमसोम सडकसमेत बाढीले बगाएपछि सडकबाटै कालीगण्डकी बगिरहेको छ।

आयोजना निर्माणमा संलग्न भारतीय कम्पनी जयप्रकाश एशोसियट्सका करिब २० वटा सवारीसाधन तथा उपकरणसमेत बाढीले बगाएको कर्मचारी कुमार यादवले बताए।

यता, कालीगण्डकी र रघुगङ्गा नदीको सङ्गममा रहेको राममन्दिर क्षेत्रसमेत जोखिममा परेको छ। गायत्रीमन्दिर पारीबाट आएको कालीगण्डकीको भँगालो राममन्दिरतर्फ ठोक्किएको छ भने पाखोबाट खसेको पहिरोले सडक अवरुद्ध भएको छ।

राहुघाट क्षेत्रमा पहिरो र लेदो बस्तीमा पस्ने समस्या समेत बढेको स्थानीयले बताएका छन्। दीर्घकालीन रूपमा पहिरो नियन्त्रणको काम नहुँदा बर्सेनि समस्या दोहोरिने गरेको उनीहरूको गुनासो छ। पछिल्लो विपद्का कारण राहुघाट क्षेत्रमा २१ घरपरिवार जोखिममा परेका छन्।