चितवनको राप्तीमा सत्तागठबन्धनको चुनावी घरदैलो अभियानलाई तिब्रता

नमस्ते चितवन

बुधबार, बैशाख २१, २०७९ मा प्रकाशित

बैशाख २१ , राप्ती । पुर्बी चितवनको राप्ती नगरपालिकामा मेयर र उपमेयरका उम्मेदवारले घरदैलो अभियानलाई तिब्रता दिएका छन् । आसन्न स्थानिय तहको निर्वाचन नजिकिदै गर्दा मतदाताहरु संगको भेटघाट बढ्न थालेको छ ।मेयर उमपेयर, वडा अध्यक्ष र वडा सदस्यका उम्मेद्वारहरुले मतदाताहरु संग भोटको अपिल गर्दै, आ-आफ्ना योजनाहरु मतदाता समक्ष प्रस्तुत गरेका छन् । राप्ती नगरपालिकामा सत्तागठबन्धनबाट मेयरमा समाजबादीका शमशेर लामा र उपमेयरमा कांग्रेसबाट देबेन्द्र लामा उम्मेदवारको रुपमा छन् ।

मेयर र उपमेयरका उम्मेद्वारले आज राप्ती वडा नं. ७, ८ र ९ मा घरदैलो अभियान सम्पन्न गरेका छन् । तीनवटा वडा मा सम्पन्न घरदैलो अभियानमा ७ स्थानमा कोणसभा गरिएको थियो । कोणसभामा बोल्दै राप्ती नगरपालिका मेयर पदका उम्मेदवार शमशेर लामाले राप्तीको बिकासका लागी समृद्ध राप्तीको योजनालाई पुरा गर्ने लक्ष्यका साथ चुनावी मैदानमा होमिएको बताए । उनले निर्वाचित भएपछि सबै जनसमुदायको समस्या समाधान गर्ने वाचा र प्रतिबद्धता समेत व्यक्त गरे ।

कार्यक्रममा राप्ती नगरपालिका उपमेयर पदका उमेदवार तथा नेपाली कांग्रेस राप्तीका अध्यक्ष देवेन्द्र लामाले आसन्न निर्वाचनमा आफूहरुले जित्नेमा बिश्वस्त रहेको बताउदै , कार्यकर्ताको उत्साहले बिजयको नजिक पुगेको महसुस गरेको बताए । उनले आफूहरुले जिते राप्तीको बिकास जिल्लाकै उत्कृष्ट बनाउने दाबी गरे । उनि भन्छन् “अहिले हामीलाई बिश्वास गरेर जिताउनुस,कार्यकर्ता र राप्तीवासीको चाहना अनुरुप कामगर्ने हाम्रो प्रतिबद्धता भयो” ।

बैशाख ३० गते हुने स्थानीय तह निर्वाचनका लागि नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाले गठबन्धन गरेका हुन् ।