ललितपुर । नेपाली कांग्रेसका सभापति गगनकुमार थापाले पार्टीभित्रका सबै तह, वर्ग र पक्षलाई समेटेर कांग्रेसलाई एकताबद्ध बनाएर अघि बढाउने बताएका छन्।
बिहीबार पार्टी केन्द्रीय कार्यालय सानेपामा बसेको केन्द्रीय कार्यसमिति बैठकको सुरुआतमा बोल्दै सभापति थापाले पार्टीभित्रका असहमति र असन्तुष्टिका विषयहरू सम्बोधन भइसकेको उल्लेख गर्दै अब महाधिवेशनलाई एकताबद्ध रूपमा सम्पन्न गर्ने बताएका हुन्। कांग्रेसको १५औँ महाधिवेशन असोज १६ देखि १९ गतेसम्म हुने कार्यतालिका यसअघि नै सार्वजनिक भइसकेको छ।
थापाले कांग्रेसलाई परिवारका रूपमा लिएर सबैलाई समेटेर अघि बढ्ने बताए। तोकिएको मितिमै महाधिवेशन सम्पन्न गर्नुपर्नेमा आफूहरू प्रतिबद्ध रहेको उल्लेख गर्दै उनले असोज १६ गते काठमाडौंको खुला मञ्चमा महाधिवेशन उद्घाटन गर्ने बताए।
उनले पार्टीभित्रको एकता नेताहरूबीचको सहमतिमा मात्र सीमित नराखी कांग्रेसबाट टाढिएका पुराना नेता, कार्यकर्ता, समर्थक तथा मतदातालाई समेत पुनः जोड्नुपर्ने बताए।
सभापति थापाले महाधिवेशनपछि पार्टीलाई थप सुदृढ बनाएर जनतामाझ जाने उल्लेख गर्दै देशभरका नेता तथा कार्यकर्तालाई एकताबद्ध भएर अघि बढ्न आग्रह गरे। पार्टीभित्रको सहमतिलाई कसले जित्यो वा कसले आफ्नो अडान छाड्यो भन्ने रूपमा नभई सबै पक्षले केही न केही लचकता अपनाएर गरेको सहमतिका रूपमा लिनुपर्ने उनको भनाइ थियो।
“मतभिन्नता हुनु स्वाभाविक हो, त्यसलाई व्यक्तिगत विवाद नबनाई संवाद र सहमतिबाट समाधान खोज्नुपर्छ,” थापाले भने। उनले पार्टीबाट टाढिएका पुराना समर्थक तथा मतदातालाई समेत पुनः जोड्नुपर्ने बताए।
थापाले पार्टीका पूर्वसभापति तथा वरिष्ठ नेताहरूलाई महाधिवेशन प्रक्रियामा सहभागी भएर एकताको सन्देश दिन आग्रह गरे। वडा, जिल्ला तथा अन्य तहका अधिवेशनको जिम्मेवारी पाएका नेताहरूलाई पनि सक्रिय रूपमा सहभागी हुन आग्रह गर्दै सहभागी हुन नसक्ने अवस्थामा विधानअनुसार वैकल्पिक व्यवस्था गर्नुपर्ने बताए।
महाधिवेशन व्यवस्थापनका लागि विभिन्न समिति गठन गरेर छोटो समयमा व्यवस्थित तयारी गर्नुपर्नेमा समेत थापाले जोड दिए। कांग्रेसको महाधिवेशन व्यवस्थापनका लागि यसअघि सभापति थापाकै संयोजकत्वमा व्यवस्थापन समिति गठन गरिएको थियो।
पार्टीभित्र देखिएका मतभेद तथा महाधिवेशनसम्बन्धी विषयमा विभिन्न चरणमा संवाद र छलफल हुँदै आएको कांग्रेसले जनाएको छ। पछिल्लो समय विभिन्न पक्षबीचको समायोजनपछि महाधिवेशन प्रक्रियालाई अघि बढाइएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.