काठमाडौं । संविधान दिवस तथा राष्ट्रिय दिवस २०८३ को अवसरमा राष्ट्रपति रामचन्द्र पौडेलले संघीय लोकतान्त्रिक गणतन्त्रात्मक शासन व्यवस्थामार्फत दिगो शान्ति, सुशासन र समृद्धिको आकाङ्क्षा पूरा गर्न सबैलाई प्रेरणा मिलोस् भन्ने कामना गर्नुभएको छ।
शुभकामना सन्देशमार्फत राष्ट्रपति पौडेलले नेपालको संविधानले बहुजातीय, बहुभाषिक र बहुसांस्कृतिक समाजलाई समान संरक्षण प्रदान गरेको उल्लेख गर्दै नेपालीबीचको आपसी सद्भाव, भ्रातृत्व र सहअस्तित्वमा आँच आउने काम नहोस् भन्ने विश्वास व्यक्त गर्नुभएको छ।
उहाँले संविधानले सामाजिक न्यायमा आधारित समतामूलक समाज तथा लोकतन्त्रमा आधारित समाजवादउन्मुख अर्थतन्त्र निर्माणको लक्ष्य लिएको उल्लेख गर्नुभएको छ। संविधानद्वारा प्रत्याभूत राज्यबाट प्राप्त हुने सेवा तथा सुविधामा सबै नागरिकको समान पहुँच सुनिश्चित गर्नुपर्ने र आमनागरिकलाई सामाजिक सुरक्षाको प्रत्याभूति दिनुपर्नेमा पनि उहाँले जोड दिनुभएको छ।
यसैगरी, रसुवाको भोटेकोशीमा आएको विनाशकारी बाढीबाट भएको जनधनको क्षतिले मुलुक गहिरो पीडामा रहेको उल्लेख गर्दै राष्ट्रपति पौडेलले बाढी प्रभावितको राहत, उद्धार र पुनःस्थापनाका लागि एकताबद्ध भएर अघि बढ्न सबैलाई आह्वान गर्नुभएको छ। यसअघि उहाँले भोटेकोशी बाढी प्रभावित रसुवा र नुवाकोटका क्षेत्रको स्थलगत अवलोकनसमेत गर्नुभएको थियो।
उपराष्ट्रपति रामसहायप्रसाद यादवले पनि संविधान दिवस तथा राष्ट्रिय दिवसका अवसरमा शुभकामना दिँदै संविधानको मूल मर्मअनुसार समावेशिता, समानता, जनसङ्ख्याका आधारमा समानुपातिक प्रतिनिधित्व र साझा भविष्यप्रति प्रतिबद्ध हुनुपर्ने बताउनुभएको छ। उपराष्ट्रपतिको कार्यालयले संविधान दिवस २०८३ सम्बन्धी सन्देशलाई आफ्नो आधिकारिक सूचना सूचीमा राखेको छ।
उपराष्ट्रपति यादवले नेपालको संविधान नेपाली जनताको दीर्घ संघर्ष, विविधता र समावेशिताको ऐतिहासिक उपलब्धि भएको उल्लेख गर्नुभएको छ। उहाँले संविधानभित्रै रहेर सामाजिक आन्दोलनका माग सम्बोधन तथा सङ्क्रमणकालीन व्यवस्थाहरूको गठन हुनुले संविधानको लचकता, समाधानमुखी प्रकृति र समावेशी चरित्र पुष्टि गरेको सन्देशमा उल्लेख गर्नुभएको छ।
नेपालको संविधान २०७२ साल असोज ३ गते जारी भएको हो। संविधान दिवस तथा राष्ट्रिय दिवस २०८३ को मूल समारोहसम्बन्धी सरकारी सूचना पनि सार्वजनिक भइसकेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.