काठमाडौं । प्रधानमन्त्री बालेन्द्र शाह संयुक्त राष्ट्रसंघको ८१औँ महासभाको उच्चस्तरीय सत्रमा सहभागी हुन आज अमेरिका प्रस्थान गर्ने भएका छन्। प्रधानमन्त्री शाहले सेप्टेम्बर २४ मा महासभाको सामान्य बहसलाई सम्बोधन गर्ने कार्यक्रम रहेको परराष्ट्र मन्त्रालयले जनाएको छ।
प्रधानमन्त्री शाह नेतृत्वको नेपाली प्रतिनिधिमण्डल आज न्यूयोर्कतर्फ प्रस्थान गर्नेछ। प्रतिनिधिमण्डलमा परराष्ट्रमन्त्री शिशिर खनाल, प्रधानमन्त्रीका प्रमुख सल्लाहकार कुमार ब्यञ्जनकार, परराष्ट्र सचिव अमृतबहादुर राईसहित नेपाल सरकारका वरिष्ठ अधिकारी सहभागी छन्।
संयुक्त राष्ट्रसंघको ८१औँ महासभाको उच्चस्तरीय सप्ताह सेप्टेम्बर २२ देखि २८ सम्म न्यूयोर्कमा हुँदैछ। महासभाको सामान्य बहस सेप्टेम्बर २२ देखि २६ र सेप्टेम्बर २८ मा सञ्चालन हुनेछ।
प्रधानमन्त्री शाहले महासभामा नेपालको धारणा प्रस्तुत गर्नुका साथै संयुक्त राष्ट्रसंघका महासचिव एन्टोनियो गुटेरेससँग भेटवार्ता गर्ने कार्यक्रमसमेत रहेको परराष्ट्र मन्त्रालयले जनाएको छ।
परराष्ट्रमन्त्री शिशिर खनाल भने सेप्टेम्बर २० मै न्यूयोर्क पुगिसकेका छन्। उनले महासभाका विभिन्न उच्चस्तरीय बैठक, साइड इभेन्ट तथा मन्त्रीस्तरीय कार्यक्रममा सहभागिता जनाउनुका साथै विभिन्न मुलुकका समकक्षीसँग द्विपक्षीय भेटवार्ता गर्ने कार्यक्रम छ।
यस वर्षको महासभाको उच्चस्तरीय सप्ताहमा जलवायु परिवर्तन, दिगो विकास, स्वास्थ्य, शान्ति तथा सुरक्षा लगायतका विषयमा विभिन्न उच्चस्तरीय बैठक हुँदैछन्। संयुक्त राष्ट्रसंघका अनुसार ८१औँ महासभाको सामान्य बहसको मुख्य विषय ‘Restoring trust, managing transformation: A United Nations that delivers for all’ रहेको छ।
नेपालले महासभाको मञ्चमार्फत आफ्ना राष्ट्रिय प्राथमिकता र अन्तर्राष्ट्रिय चासोका विषय प्रस्तुत गर्ने तयारी गरेको छ। हालैका जलवायुजन्य विपद्का सन्दर्भमा नेपालले जलवायु परिवर्तनका असर र जलवायु न्यायसँग सम्बन्धित विषयलाई पनि अन्तर्राष्ट्रिय मञ्चमा उठाउने तयारी गरेको छ।
प्रधानमन्त्री शाह सेप्टेम्बर २६ मा स्वदेश फर्किने कार्यक्रम रहेको परराष्ट्र मन्त्रालयले जनाएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.