प्रस्तावित निर्वाचन आयुक्त कृष्णमान प्रधान संसदीय सुनवाइ समितिबाट अस्वीकृत

नमस्ते चितवन

सोमबार, साउन १४, २०८१ मा प्रकाशित

काठमाडौं,साउन १४
निर्वाचन आयोगको आयुक्तमा प्रस्तावित कृष्णमान प्रधानलाई संसदीय सुनुवाइ विशेष समितिले अस्वीकृत गरेको छ ।प्रधान स्वयमले आफू सो पदका लागि इच्छुक नरहेको भन्दै निवेदन दिनुभएको थियो । संसद भवन नयाँ बानेश्वरमा सोमबार बसेको सुनुवाइ समितिले प्रधानको नाम अस्वीकृत गर्ने निर्णय गरेको हो ।

संवैधानिक परिषद्ले गत असार २ गते उहाँको नाम निर्वाचन आयुक्तमा प्रस्ताव गरी संसदीय सुनुवाइका लागि सङ्घीय संसद् सचिवालयमा पठाएको थियो । समितिले यसअघि यही साउन ९ गते निर्वाचन आयुक्तमा प्रस्तावित नेपाल कानुन समाजका कार्यकारी निर्देशक प्रधानको संसदीय सुनुवाइ गरेको थियो ।

बैठकमा प्रस्तावित निर्वाचन आयुक्त प्रधानले आफ्नो अनुभव, योग्यता, क्षमतासहितको योजनासम्बन्धी अवधारणा र कार्ययोजना प्रस्तुत गर्नुभएको थियो । उहाँका विरुद्धमा महिला हिंसा गरेको आरोप लगाउँदै चार वटा उजुरी परेका थिए ।