विकास आयोजनाका काम अपेक्षाकृत भएन : मन्त्री झाँक्री

नमस्ते चितवन

शनिबार, जेठ १४, २०७९ मा प्रकाशित

जेठ १४, काठमाडौं । सहरी विकासमन्त्री रामकुमारी झाँक्रीले आवश्यक अध्ययन अनुसन्धान तथा बजेटको सुनिश्चितताको अभावमा विकास आयोजनाका काम अपेक्षा गरिए अनुरुप अगाडि बढ्न नसकेको बताउनुभएको छ । उहाँले सहरबासीको स्वस्थ्य र सुन्दर जीवनका लागि सफा र सुन्दर सहर अपरिहार्य रहेको स्पष्ट पार्नुभयो ।

उहाँले केही वर्षयता स्मार्ट सहर, नयाँ सहर, भ्यु टावर, ठूला ठूला सभाहललगायतका महत्वकाङ्काक्षी आयोजनाहरु अघि सारिए पनि त्यसको उद्देश्य, निर्माण, सञ्चालन तथा लगानीको ढाँचाबारे स्पष्टता नभएको बताउनुभयो । उहाँले स्पष्ट योजनाविनाको भ्यूटावर उन्नति र समृद्धिको द्योतक हुन नसक्ने स्पष्ट पार्नुभयो ।

सहरी विकास मन्त्रालयद्धारा शुक्रबार राजधानीमा आयोजित सहरी विकाससँग सम्बन्धित समसमायिक विषयमा सञ्चारकर्मीहरुको लागि अभिमुखीकरण तथा अन्तरक्रिया कार्यक्रममा मन्त्री झाँक्रीले सो धारणा व्यक्त गर्नुभएको हो । उहाँले समाज र मुलुकको समस्या तथा राज्यले लिएको नीतिबारे राम्रो ज्ञान भएका सञ्चारकर्मीले मात्र देश र जनताको पक्षमा पत्रकारिता गर्नसक्ने धारणा व्यक्त गर्नुभयो ।

उहाँले नीति निर्माण तथा राज्यको उच्च तहमा रहेका कतिपय व्यक्तिहरु नै विकासको बाधक रहेको चर्चा गर्दै बताउँदै तिनीहरुले नै खोकना, बन्चरेडाँडा, सिसडोलजस्ता आयोजनास्थलहरुमा जग्गा खरिद तथा पलटिङ गरी आयोजनाहरुलाई अगाडि बढाउन अवरोध पुर्याएको आरोपसमेत लगाउनुभयो ।

कार्यक्रममा सहरी विकास मन्त्रालयका सचिव डा. रमेशप्रसाद सिंहले सहरीकरणमा देखिएका चुनौती र तथा आगामी कार्यदिशा, सहरी विकास तथा भवन निर्माण विभागका महानिर्देशक पद्मकुमार मैनाली र विभागका सिनियर डिभिजनल इन्जिनियर रोशन श्रेष्ठले राष्ट्रिय सहरी नीतिबारे कार्यपत्र प्रस्तुत गर्नुभएको थियो ।