नारायणगढ । पृथ्वी राजमार्गअन्तर्गत कृष्णभीरमा पहिरो खसेर सडक पूर्णरूपमा अवरुद्ध भएपछि निर्माण थालिएको नयाँ ट्र्याक निर्माण अन्तिम चरणमा पुगेको छ। आइतबार भित्तातर्फको कटिङ तथा सडक सम्याउने काम सम्पन्न भएपछि केही सवारीसाधनलाई परीक्षणका रूपमा नयाँ ट्र्याकबाट आवतजावत गराइएको थियो।
परीक्षण सफल भएपछि ट्र्याकलाई नियमित सवारी सञ्चालनका लागि तयार पार्ने कामलाई तीव्रता दिइएको छ। नयाँ ट्र्याक निर्माणको जिम्मा पाएको निर्माण कम्पनीका इञ्जिनियर ईश्वर नेपालका अनुसार आज ११औँ दिनमा ग्राभेलिङ, स्लोप कटिङ र नाली निर्माणको काम भइरहेको छ।
उनका अनुसार असोज १ गतेदेखि पूर्ण रूपमा यातायात सञ्चालन गर्ने लक्ष्यसहित काम भइरहेको छ। निर्माणको पहिलो चरणमा ९ देखि १० दिनसम्म ११–१२ वटा उपकरण परिचालन गरिएको थियो। अहिले निर्माण अन्तिम चरणमा पुगेकाले करिब ४०–५० जना दक्ष तथा अदक्ष मजदुर खटिएका छन्। आवश्यकताअनुसार ग्रेडर, रोलर र एक्साभेटरसहित पाँच–छ वटा हेभी इक्युपमेन्ट प्रयोग भइरहेका छन्।
हाल नदीबाट ल्याइएको गेग्रान प्रयोग गरी नयाँ ट्र्याकमा ग्राभेलिङ भइरहेको छ। सडकको किनारमा ड्रेन निर्माण गरी पाइप राख्ने र त्यसलाई घेरेर टिक ड्रेन निर्माण गर्ने काम पनि भइरहेको इञ्जिनियर नेपालले बताए। सब–बेसको अन्तिम तह निर्माण सम्पन्न भएपछि सडक यातायात सञ्चालनका लागि तयार हुने उनको भनाइ छ।
करिब ३०० मिटर लामो नयाँ ट्र्याकमा सात मिटर चौडाइको सडक निर्माण गरिएको छ। नालीसहित संरचनाको कुल चौडाइ करिब साढे सात मिटर रहेको निर्माण कम्पनीले जनाएको छ।
इञ्जिनियर नेपालले कृष्णभीरको यो खण्ड केही जोखिमपूर्ण रहेकाले थप पहिरो नआए तोकिएको समयमै यातायात सञ्चालन गर्न सकिने बताए।
यसैबीच, नागढुङ्गा–मुग्लिन सडक योजना (पश्चिम खण्ड) का सूचना अधिकारी इञ्जिनियर सचेन्द्र मिश्रले आइतबार नयाँ ट्र्याकको ग्रेडिङ सम्पन्न भएपछि फिनिसिङको काम भइरहेको जानकारी दिए।
उनका अनुसार आइतबार परीक्षणका लागि मात्र केही सवारीसाधनलाई नयाँ ट्र्याकबाट पास गराइएको हो। हाल ट्र्याक सर्वसाधारणका लागि पूर्णरूपमा बन्द रहेको उनले स्पष्ट पारे।
“सर्वसाधारण नयाँ ट्र्याक खुला गरिएको भ्रममा नपर्नुहोला। परीक्षणका लागि मात्र केही हिजो सवारीसाधन पास गराइएको हो,” मिश्रले भने।
थप समस्या नआए असोज १ गतेसम्म निर्माणका सबै काम सम्पन्न गरी नयाँ ट्र्याकबाट नियमित रूपमा सवारीसाधन सञ्चालन गर्ने योजना रहेको उनले बताए।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.